सोलापूर : अक्कलकोट तालुक्यातील संगोगी त्या गावांमध्ये ग्रामपंचायतीने मागील दहा महिन्यांपासून कोणतीही ग्रामसभा घेतली नाही या प्रकरणात तक्रारदाराने केलेल्या मागणीनुसार उपमुख्य कार्यकारी अधिकारी शेळकंदे यांनी अक्कलकोट पंचायत समितीच्या गटविकास अधिकाऱ्यांना नोटीस काढा अशा सूचना विभागाला दिल्या आहेत.
संगोगी या गावांमध्ये सन 2021 या वर्षात मार्च ते डिसेंबर व जानेवारी 2022 या अकरा महिन्यात एक ही ग्रामपंचायतची मासिक सभा घेतली गेली नाही अशी तक्रार ग्रामपंचायत सदस्य शंकर हर्डीकर यांनी गटविकास अधिकारी यांच्याकडे केली होती. ते मागील पाच महिन्यापासून अक्कलकोट पंचायत समितीकडे चौकशी करण्यासाठी तक्रार करत आहेत मात्र यावर कोणतीही कार्यवाही होत नाही.
ग्रामपंचायत सदस्य शंकर हर्डीकर यांनी जुलै महिन्यात पंचायत समितीकडे पहिली तक्रार केली होती. त्यानंतर हर्डीकर यांनी जिल्हाधिकाऱ्यांकडे तक्रार केली जिल्हाधिकाऱ्यांनी जिल्हा परिषदेला चौकशी करण्याच्या सूचना केल्या जिल्हा परिषदेचे उपमुख्य कार्यकारी अधिकारी ग्रामपंचायत यांनी अक्कलकोट गटविकास अधिकाऱ्याला पत्र काढून चौकशी करण्याचे आदेश दिले मात्र मागील सात ते आठ महिन्यात कोणतीही कार्यवाही झाली नाही शेवटी वैतागलेल्या हर्डीकर यांनी या प्रकरणी विभागीय आयुक्तांकडे चौकशी करण्याची मागणी केली आहे. या प्रकरणाची जिल्हा परिषदेचे मुख्य कार्यकारी अधिकारी यांना काहीही माहिती नसल्याचे समोर आले.
याच पार्श्वभूमीवर तक्रारदार शंकर हर्डीकर यांनी गुरुवारी जिल्हा परिषदेमध्ये येऊन ग्रामपंचायत विभागाचे उपमुख्य कार्यकारी अधिकारी इशाधीन शेळकंदे यांची भेट घेतली सर्व कागद पाहून अवाक झालेल्या शेळकंदे यांनी तातडीने अक्कलकोट गटविकास अधिकाऱ्यांना नोटीस काढा, याप्रकरणी काय कार्यवाही केली याचा खुलासा मागवा अशा सूचना ग्रामपंचायत विभागाला दिल्या. अक्कलकोट पंचायत समितीचे प्रभारी गटविकास अधिकारी आयवळे हे ‘रबर स्टॅम्प’ बीडिओ असून त्यांचा सर्व कारभार विस्तार अधिकारी घुगरे व तुळजापुरे हे दोघे चालवत असल्याची चर्चा तालुक्यामध्ये आहे.
