सोलापूर : जिल्हा दूध संघाची निवडणूक प्रक्रिया सुरू असून अर्ज माघार घेण्याची शेवटची तारीख 15 फेब्रुवारी आहे. सोलापूर जिल्हा दूध संघाची निवडणुक बिनविरोध करण्यासाठी ज्येष्ठ आमदार बबनदादा शिंदे, माजी मंत्री दिलीप सोपल या दोन प्रमुख नेत्यांवर जबाबदारी सोपवण्यात आली आहे. करमाळ्याचे आमदार संजय मामा शिंदे यांच्या निमगाव इथल्या फार्महाऊसवर झालेल्या बैठकीला भाजपचे सहयोगी आमदार प्रशांत परिचारक यांची विशेष उपस्थिती होती. यावरून ही निवडणूक निश्चित बिनविरोध होईल अशी शक्यता दाट शक्यता आहे.
शनिवारी सोलापूर शहरातील रेस्ट हाऊसवर बैठक आयोजित करण्यात आली असून संजयमामाच्या फार्म हाऊसवर बैठकीला माजी मंत्री सिद्धाराम म्हेत्रे, माजी आमदार दिलीप माने, माजी आमदार राजन पाटील, आमदार संजयमामा शिंदे, आमदार प्रशांत परिचारक, काँग्रेसचे नेते सुरेश हसापुरे, मंगळवेढ्याचे बबनराव आवताडे,माजी आमदार दीपक साळुंखे, सांगोल्याचे चंद्रकांत देशमुख, पंढरपुरातून भगीरथ भालके यांची उपस्थिती होती. शनिवारी दुपारी दोन वाजता शासकीय विश्रामगृहावर जिल्ह्यातील सर्वपक्षीय नेत्यांनी उपस्थित रहावे ज्या ज्या तालुक्यातील नेत्यांच्या समर्थकांनी अर्ज दाखल केले आहेत त्या सर्व उमेदवारांनी सुद्धा उपस्थित राहावे असे आवाहन बबनराव शिंदे व दिलीप सोपल यांनी केले आहे
