सोलापूर महापालिकेची न्यु बुधवार पेठेतील जुन्या बस डेपोची १० गुंठे जागा आयएमसी कंपनीला सीएनजी पंपासाठी देण्याचा विषयावरून महापालिकेच्या सर्वसाधारण सभेत बरीच खडाजंगी झाली. विरोधी पक्ष नेते अमोल शिंदे आणि नगरसेवक आनंद चंदनशिवे यांच्यात शाब्दिक चकमक उडाली. चंदनशिवे यांच्यावर अमोल शिंदे यांनी तोफ डागत आता निवडणुकीच्या तोंडावरच या भागातील लोकांचा एवढा कळवळा का? असा सवाल करत चंदनशिवे यांच्यावर तोंडसुख घेतले.
विशेष म्हणजे राष्ट्रवादी काँग्रेस पक्षातील संभाव्य नेत्यांमध्ये सभागृहात जुंपली असताना महेश कोठे यांनी मात्र बघ्याची भूमिका घेत वादाचा आनंद घेतला. सोलापूर महापालिकेची सर्वसाधारण सभा गुरुवारी सायंकाळी महापौर श्रीकांचना यन्नम यांच्या अध्यक्षतेखाली झाली. न्यू बुधवार पेठेतील जुन्या बस डेपोची एक एकर जागा आयएमसी कंपनीला भाड्याने देण्याचा ठराव २०१८ मध्येच झाला आहे. न्यायालयीन प्रक्रियेतून बाहेर पडलेली उर्वरित १० गुंठे जागा त्या कंपनीला देण्याचा प्रस्ताव सभेच्या अजेंड्यावर होता.
न्यु बुधवार पेठेत लोकवस्ती आहे. याच भागात सीएनजी पंप करणे धोक्याचे आहे, असे म्हणत घटनेचा आनंद चंदनशिवे आणि सुरेश पाटील यांनी विरोध दर्शविला. लोकांचा जीव धोक्यात घालून पंप उभारणार का, असा प्रश्न विचारत चंदनशिवे यांनी आणखी एक उपसूचना मांडली. मात्र यापूर्वीच या कंपनीला एक एकर जागा देण्याचा ठराव झाला आहे. आता केवळ दहा गुंठे जागा देण्याचा विषय आहे. आपल्या माहितीनुसार सीएनजी धोक्याचे नाही. त्यामुळे या प्रस्तावाला विरोध होऊ नये अशी भूमिका विरोधी पक्षनेता अमोल शिंदे यांनी मांडली.
महापौरांनी आनंद चंदनशिवे यांची उपसूचना फेटाळली. भाजप आणि शिवसेनेचा या कामाचा रंग मला समजला, असे नगरसेवक आनंद चंदनशिवे म्हणाले. आमचा रंग समजला. तुमचा कोणता आहे? असे विरोधीपक्षनेते अमोल शिंदे यांनी विचारले. बराच वेळ खडाजंगी झाली.
अखेर महापौर श्रीकांचना यन्नम यांनी नगरसेवक आनंद चंदनशिवे यांची उपसूचना फेटाळली. विरोधी पक्षनेते यांची उपसूचना मान्य करून प्रस्ताव मंजूर केला. आनंद चंदनशिवे यांनी राष्ट्रवादी काँग्रेसशी घरोबा केला असला तरी अधिकृत प्रवेश झालेला नाही. महेश कोठे यांच्यावर महापालिकेची संपूर्ण जबाबदारी दिली आहे, त्यांचा ही अद्याप प्रवेश झालेला नाही. कोठे सोबत विरोधी पक्षनेते अमोल शिंदे हे सुद्धा राष्ट्रवादी काँग्रेस मध्ये जाणार असल्याची चर्चा ऐकण्यास मिळते. प्रभाग रचनेवरून महेश कोठे यांच्यावर राष्ट्रवादी काँग्रेस मधील अनेक नेत्यांचा राग आहे.
भारत जाधव यांच्या मंगल कार्यालयात प्रभाग रचनेवरून चांगलाच वाद झाला, गटनेते किसन जाधव यांनी कोठे यांना चांगलेच फैलावर घेतले, चंदनशिवे व तौफिक शेख यांनीही याप्रकरणी नाराजी व्यक्त केली. त्यानंतर कोठेंना थेट हॉस्पिटलमध्ये जावे लागले. किसन जाधव, आनंद चंदनशिवे ही मंडळी महेश कोठे यांच्याशी जास्त जुळवून घेत नसल्याचे बोलले जाते. अमोल शिंदे मात्र कट्टर कोठे समर्थक आहेत. राष्ट्रवादी काँग्रेस मध्ये जी अंतर्गत धुसफूस सुरू आहे त्याचेच तर पडसाद महापालिका सभेत उमटले नसतील ना ? असा प्रश्न आता राजकीय वर्तुळात उपस्थित होत आहे.
