अभिनंदन ! ग्लोबल टीचर डिसले गुरुजींना “शिस्ती’चा धडा देणाऱ्या पत्रकाराचा गोव्याच्या मुख्यमंत्र्यांनी केला सन्मान

सोलापूर: ग्लोबल टीचर डिसले गुरुजी (Global Teacher Ranjit Disale) यांना बातम्यातून “शिस्ती’चा धडा देणाऱ्या लोकमतचे वरिष्ठ उपसंपादक राजकुमार सारोळे यांना गोव्याचे मुख्यमंत्री डॉ. प्रमोद सावंत (Goa CM Pramod Sawant) यांच्या हस्ते “शोध पत्रकारितेचा’ पुरस्कार देऊन सन्मान करण्यात आला. 

गोवा येथे रविवारी रात्री झालेल्या एका शानदार कार्यक्रमात लोकमत अचिव्हर्स अवार्ड प्रदान करण्यात आले. यात पत्रकार सारोळे यांचा हा सन्मान करण्यात आला. यावेळी लोकमत वृत्तसमूहाचे चेअरमन विजय दर्डा, एडिटर इन चीफ राजेंद्रबाबू दर्डा, संचालक करण दर्डा, देवेन दर्डा, मुख्य संपादक विजय बाविस्कर यांच्यासह राज्यातील लोकमत आवृत्तीचे संपादक, व्यवस्थापक व इतर विभाग प्रमुख उपस्थित होते. या कार्यक्रमात लोकमत परिवारअंतर्गत गेल्या वर्षभरात उत्तम कामगिरी केलेल्या टीमना पुरस्कार देण्यात आले. हा कार्यक्रम सुरू असतानाच मुख्यमंत्री डॉक्टर सावंत तेथे आले. यावेळी लोकमत वृत्तपत्र समूहाचे चेअरमन विजय दर्डा यांनी त्यांना पुढील पुरस्कार घोषित करण्याची विनंती केली त्यामध्ये शोध पत्रकारितेचा पुरस्कार राजकुमार सारोळे यांना जाहीर करण्यात आला व मुख्यमंत्री डॉ. सावंत यांनी त्यांना हा पुरस्कार प्रदान केला. यावेळी सोलापूर लोकमत आवृत्तीचे निवासी संपादक सचिन जवळकोटे, सहाय्यक सरव्यवस्थापक  रमेश तावडे, हॅलोहेड रवींद्र देशमुख, वसुली विभाग प्रमुख मनोहर नवाल, वितरण व्यवस्थापक शिवप्रसाद क्यातमवार, लेखाधिकारी अविनाश ओलेकर, जाहिरात व्यवस्थापक संतोष सावळगी, सांस्कृतिक विभाग प्रमुख बोरोटीकर, आर्टिस्ट अशोक हिरासकर आदी उपस्थित होते.

जीवनातील सर्वोच्च पुरस्कार…

लोकमत परिवाराने केलेला हा सन्मान माझ्या जीवनातील सर्वोच्च आनंदाचा क्षण आहे, असे  सारोळे यांनी सिंहासनशी बोलताना सांगितले. माझ्या पुरस्काराच्या यशामध्ये निवासी संपादक श्री. जवळकोटेसर, सहाय्यक सरव्यवस्थापक श्री. तावडेसर, हॅलोहेड देशमुख आणि सर्व संपादकीय टीमचा वाटा आहे, असेही त्यांनी नमूद केले.

यासाठी मिळाला हा पुरस्कार…

राजकुमार सारोळे ग्लोबल टीचर डिसले गुरुजी यांच्यावर वृत्तमालिका लिहिली होती. अमेरिकेच्या फुल्ब्राईट संस्थेने डॉक्टरेट साठी डिसले गुरुजींना शिष्यवृत्ती मंजूर केल्यावर रजा मागण्यासाठी ते जिल्हा परिषदेत आले होते. यावेळी शिक्षणाधिकारी किरण लोहार व डिसले गुरुजी यांच्यात झालेल्या संवादावरून सारोळे यांनी “लोकमत’ मध्ये “जिल्हा परिषदेच्या शाळेतसाठी तुम्ही काय केले’ अशी बातमी ब्रेकिंग केली होती. लोकमतच्या सर्व आवृत्तीमध्ये हे वृत्त ठळकपणे प्रसिद्ध झाले होते. या बातमीची राज्यभरातील सर्व वृत्तपत्र व वृत्तवाहिन्यांनी दखल घेतली. शेवटी शिक्षणमंत्र्यांनी हस्तक्षेप करून डिसले गुरुजींना रजा मिळवून दिली होती. पण पुढे डिसले गुरुजींच्या ग्लोबल पुरस्कारावरुन मोठे वादळ निर्माण झाले. अजूनही डिसले गुरुजीनी याबाबत प्रसारमाध्यमासमोर सत्य प्रकट केले नाही, हे विशेष.