सोलापूर : धनगर समाजाच्या आरक्षणाकडे लक्ष वेधण्यासाठी सोलापुरात जिल्ह्याचे पालकमंत्री राधाकृष्ण विखे पाटील यांच्या अंगावर धनगर आरक्षण कृती समितीचे शेखर बंगाळे यांनी भंडारा उधळून लक्ष वेधले. याच ठिकाणी उपस्थित असलेले भाजपचे शहराध्यक्ष नरेंद्र काळे यांनीही चिडून बंगाळे यांना मारहाण केली नंतर पोलिसांनी बंगाळे यांना ताब्यात घेतले.
या घटनेनंतर पालकमंत्री राधाकृष्ण विखे पाटील आणि भाजप शहराध्यक्ष नरेंद्र काळे यांच्यावर जोरदार टीका होऊ लागली आहे परंतु नेमके काय घडले हे मात्र पाहणे गरजेचे आहे.
शुक्रवार सकाळी सव्वा दहाच्या सुमारास पालकमंत्री राधाकृष्ण विखे पाटील हे आपले काही सहकारी ज्यामध्ये प्रदेश सरचिटणीस शहाजी पवार, सोलापूर शहराध्यक्ष नरेंद्र काळे, जिल्हा सरचिटणीस शशिकांत चव्हाण यांच्यासह जिल्ह्याच्या काही प्रमुख अधिकाऱ्यांसोबत शासकीय विश्रामगृहावर चर्चा करत होते.
याचवेळी धनगर आरक्षण कृती समितीचे शेखर बंगाळे शासकीय विश्रामगृहात आले. त्यांनी कपाळाला भंडारा लावला होता, गळ्यात पिवळा शेला घातला होता बंगाळे वादग्रस्त असल्याने पोलिसांनी त्यांना प्रवेशद्वारात अडवले. पण बंगाळे यांनी आपणाला पालकमंत्र्यांना निवेदन द्यायचे आहे असे वारंवार पोलिसांना सांगितले. जेव्हा ही माहिती आतमध्ये असलेले शहराध्यक्ष नरेंद्र काळे यांना समजली तेव्हा त्यांनी पोलिसांना आत सोडण्यास सांगितले. त्यामुळे पोलिसांनी बंगाळे व त्यांच्या सहकार्याला आत सोडले. स्वतः काळे यांनी आपल्या समाजाचा माणूस आहे आणि धनगर समाजाचे आरक्षण हा महत्त्वाचा विषय घेऊन आलेला आहे म्हणून स्वतः त्याला हाताला धरून पालकमंत्र्याजवळ नेले आणि निवेदन घ्यावे अशी विनंती केली.
पण बंगाळे यांनी हीच संधी साधून खिशातून भंडाऱ्याची पुडी काढून पालकमंत्र्यांच्या डोक्यावर ओतली, पालकमंत्र्यांच्या डोळ्यावर चष्मा असल्याने त्यांच्या डोळ्याला कोणतीही इजा झाली नाही याच वेळेस बंगाळे यांनी विश्वासघात केला हे लक्षात आल्यानंतर नरेंद्र काळे चिडले. काळे यांच्यासह तिथे उपस्थित पोलिसांनी सुद्धा बंगाळे यांना धरून मारहाण केली. यावेळी राधाकृष्ण विखे पाटील यांनी सोडा त्याला अशा सूचना पोलिसांना दिल्या. तसेच शहाजी पवार यांनीही अरे त्यांना अटक करू नका सोडून द्या असे पोलिसांना म्हणाले. परंतु कायदा सुव्यवस्थेचा प्रश्न असल्याने पोलिसांनी आपली जबाबदारी पार पडताना शेखर बंगाळे याला ताब्यात घेतले. नरेंद्र काळे यांच्या जागेवर दुसरा कुणी असता तर तेच केले असते असे चित्र यावेळी दिसून आले.
सकाळी अकरा वाजता सोलापूर जिल्हा परिषदेच्या आदर्श शिक्षक पुरस्काराचे वितरण हुतात्मा स्मृती मंदिरात होते. या घटनेनंतर पालकमंत्री येणार की नाही? अशा टेन्शनमध्ये जिल्हा परिषदेचे प्रशासन दिसून आले. परंतु संयमी आणि प्रचंड मोठा राजकीय अनुभव असलेल्या महसूल मंत्री राधाकृष्ण विखे पाटील यांनी जिल्हा परिषदेच्या कार्यक्रमाला उपस्थिती लावली झेडपी प्रशासन कार्यक्रम लवकरात लवकर आटोपण्याचा तयारीत होते. पण अर्धा तासापूर्वी घडलेल्या घटनेचे कोणतेही टेन्शन त्यांच्या चेहऱ्यावर दिसून आले नाही. तब्बल सव्वा तास पालकमंत्री या कार्यक्रमाला थांबले. 20 मिनिटं उपस्थिताना मार्गदर्शन केले. हा मोठेपणा पालकमंत्र्यांनी दाखवला.
