सोलापूर : सोलापूर शहर राष्ट्रवादी काँग्रेसचे शहर कार्याध्यक्ष संतोष पवार यांच्यावर पक्षाने नवी जबाबदारी सोपवली आहे. राष्ट्रवादीच्या प्रदेश सचिव पदी त्यांची नियुक्ती करण्यात आली असून प्रदेशाध्यक्ष राज्याचे जलसंपदा मंत्री जयंत पाटील यांच्या हस्ते निवडीचे पत्र संतोष पवार यांना प्रदान करण्यात आले आहे. ही निवड झाल्यानंतर पवार यांनी आपल्या फेसबुक पेजवर नवी जबाबदारी म्हणून आदरणीय शरदचंद्र पवार साहेब, आदरणीय अजितदादा पवार, आदरणीय जयंत पाटील, सन्मानीय शिवाजीराव गर्जे यांनी माझी राष्ट्रवादी काँग्रेस पक्षाच्या प्रदेश सचिवपदी नियुक्ती केली आहे. नव्या जबाबदारीचा मी मनःपूर्वक स्वीकार केला आहे. मी यापुढील काळातही साहेब, दादा आणि ताई यांचा विचार आणखी बळकट करेन. पक्ष संघटन मजबूत करण्यासाठी प्रदेशाध्यक्ष जयंत पाटील यांच्या मार्गदर्शनाखाली कार्यरत राहीन… अशी गोष्ट टाकली आहे.
तसेच
सर्वांना नमस्कार,
युगपुरुष छत्रपती शिवाजी महाराज, महात्मा ज्योतिबा फुले, पुण्यश्लोक अहिल्यादेवी होळकर, राजर्षी शाहू महाराज, महामानव डॉ. बाबासाहेब आंबेडकर, लोकशाहीर अण्णा भाऊ साठे यांच्या विचारधारेवर निष्ठा ठेवून काम करणारा मी कार्यकर्ता आहे.
आदरणीय शरदचंद्र पवार साहेब, आदरणीय अजित दादा पवार, आदरणीय सुप्रियाताई सुळे यांनी साडेचार वर्षांपूर्वी मला राष्ट्रवादी काँग्रेसचा शहर कार्याध्यक्ष म्हणून काम करण्याची संधी दिली. कार्याध्यक्ष म्हणून काम करताना मी पक्षाचे अध्यक्ष ज्येष्ठ नेते, प्रांतिक पदाधिकारी, सर्व विधानसभा अध्यक्ष, कार्याध्यक्ष, सर्व फ्रंटल यांना सोबत घेऊन काम केले. पक्षाच्या अडचणीच्या काळात मेळावे, आंदोलने, संघर्ष यात्रा, हल्लाबोल यशस्वी करून दाखवली. पक्षाच्या अभिप्राय अभियानात राज्यात अव्वल क्रमांक पटकाविला. पक्षाच्या प्रमुख नेत्यांनी आमचा सन्मान केला.
आदरणीय शरद पवार साहेब यांच्या सहकार्यामुळेच मोठे झालेले लोक मध्यंतरीच्या काळात पक्ष सोडून गेले. या काळात साहेबांनी माझ्यासारख्या कार्यकर्त्याला सोबत घेऊन सोलापूरच्या हुतात्मा स्मृती मंदिरात भव्य सभा घेतली. साहेबांचा सारथी बनायची संधी मिळाली. या सभेनंतर राज्यातील वातावरण बदलले. पक्षाच्या संघर्ष काळाचा आणि त्या ऐतिहासिक सभेचा घटक असल्याचा मला आजही अभिमान आहे.
मी सामान्यातील सामान्य माणसाला पक्षासोबत जोडण्याचा प्रयत्न केला. पक्ष संघटन आणखी मजबूत करण्याचा प्रयत्न केला. या कालावधीत मला साथ देणारे नेते, जिवाभावाचे मित्र, कार्यकर्ते, सामाजिक कार्यकर्ते, पत्रकार बंधू आणि हितचिंतक यांनी मोलाची साथ दिली. या सर्वांचे मी आभार मानतो.
आपल्या सर्वांची साथ व सहकार्यामुळेच मी हे करू शकलो. आपल्या सर्वांचे मनःपूर्वक आभार.
