जगन्नाथ बनसोडेंना उच्च न्यायालयात दिलासा ; पोलिसांना काय दिले आदेश
सोलापूर महानगरपालिकेतील भंगार चोरी प्रकरण चांगलेच गाजले. तत्कालीन अतिक्रमण प्रमुख जगन्नाथ बनसोडे यांच्यासह इतर काही जणांविरुद्ध गुन्हा दाखल झाला. दरम्यान या प्रकरणी उच्च न्यायालयाच्या कोल्हापूर सर्किट बेंचने आदेश दिला आहे की, जगन्नाथ बनसोडे यांच्याविरुद्ध दोषारोपपत्र दाखल न करण्याच्या सूचना पोलिसांना केल्या आहेत.
यात हकिकत अशी की दि. १८/०५/२०२६ रोजी अविनाश वाघमारे यांनी सहा. उपायुक्त संदीप कारंजे यांनी दिलेल्या आदेशानुसार तत्कालीन अतिक्रमण प्रमुख जगन्नाथ बनसोडे व इतरांविरुध्द सोलापूर महानगरपालिका यांच्या ताब्यातील भंगार वस्तूंची संगनमत करून चोरी केल्याची सदर बझार पोलिस ठाण्यात फिर्याद दाखल केली होती.
सदर फिर्यादीस तत्कालीन अतिक्रमण प्रमुख जगन्नाथ बनसोडे यांनी कोल्हापूर येथील उच्च न्यायालयात विधिज्ञ निलेश जोशी यांच्यावतीने आव्हान देवून फिर्याद रद्द करण्याची मागणी केली आहे. सदर प्रकरणी चोरी झाल्याबाबत कोणतीही कागदपत्रे व वस्तूंची शहानिशा न करता तसेच तथाकथित चोरी झालेल्या वस्तू या जागेवरच असल्यामुळे नक्कीच चोरी झाली का? कि कायदेशीर मार्गाने वस्तू घेऊन जाण्यात येत होत्या, याबाबत चौकशी न करता चोरी झाले असा खोटा आरोप करुन दबावापोटी पोलीसांनी फिर्याद दाखल करून घेतली असल्याचे कागदपत्रांच्या आधारे मा. उच्च न्यायालयाच्या निदर्शनास दिले.
अतिक्रमण प्रमुख जगन्नाथ बनसोडे यांच्या वतीने विधिज्ञ निलेश जोशी यांनी केलेला युक्तिवाद ग्राह्य धरुन न्यायमूर्ती संदेश पाटील यांनी प्रस्तूत प्रकरणी पोलिसांना नोटीस काढून जगन्नाथ बनसोडे यांच्या विरोधात मे. न्यायालयात दोषारोपपत्र दाखल न करण्याचे आदेश दिलेले आहेत.
यात तत्कालीन अतिक्रमण प्रमुख जगन्नाथ बनसोडे यांच्या वतीने विधिज्ञ निलेश जोशी, विधिज्ञ शक्ती कोळेकर व विधिज्ञ स्मिता शिंदे यांनी काम पाहिले.
