चेतन नरोटेंसह तब्बल 20 जण काँग्रेस शहराध्यपदासाठी इच्छुक ; निरीक्षकांनी घेतला आढावा
सोलापूर : सोलापूर शहर काँग्रेस पक्षाच्या संघटनात्मक बांधणीसाठी काँग्रेस पक्षाचे निरीक्षक ओरिसाचे माजी आमदार देवशेष पटनायक हे दोन ते तीन दिवस सोलापूर दौऱ्यावर आहेत. सोलापुरात महापालिका, जिल्हा परिषद व पंचायत समिती निवडणुकीत काँग्रेस पक्षाला आलेल्या अपयशानंतर संघटनेत बदल करावेत अशी मागणी आहे त्या कार्यकर्त्यांमधून पुढे आली आहे.
विशेष करून सोलापूर शहराध्यक्ष बदलण्याच्या मागणीने जोर धरला आहे.
निरीक्षक देवशेष पटनाईक यांनी काँग्रेस भवनात घेतलेल्या कार्यकर्त्यांच्या वैयक्तिक भेटीत आणि मुलाखतीत विद्यमान शहराध्यक्ष चेतन नरोटे यांच्या सह तब्बल वीस कार्यकर्त्यांनी शहराध्यक्ष पदासाठी इच्छा व्यक्त केली असल्याचे सांगण्यात आले.
मागील अनेक दिवसांपासून शहराच्या अध्यक्षपदासाठी इच्छुक असणारे माजी महापौर संजय हेमगड्डी यांनी पण श्रेष्ठीसमोर इच्छा व्यक्त केली आहे. हेमगड्डी यांच्यासह ज्येष्ठ नेते राजन कामत, युवक अध्यक्ष गणेश डोंगरे, माजी शिक्षण सभापती सुनील रसाळे, माजी नगरसेवक उदय चाकोते, माजी नगरसेवक हारून शेख, नागनाथ कदम, माजी सभापती सुभाष चव्हाण असे या वीस जणांमध्ये इच्छुकांची नावे असल्याचे सूत्रांकडून सांगण्यात आले.
विशेष करून मुस्लिम समाज आणि पद्मशाली समाजातून कोणत्याही मोठ्या नेत्याने अध्यक्षपदाची मागणी केली नसल्याचे समजले.
कोणी काहीही करो, पण खासदार प्रणिती शिंदे यांच्या मर्जी शिवाय पक्षश्रेष्ठी सोलापूरचा अध्यक्ष निवडणार नाहीत हे पण तितकेच खरे आहे.
