सोलापूर : जिल्ह्यातील जनावरांमध्ये लम्पी स्कीन (#Lumpy_Skin_Disease) हा आजार जलद गतीने पसरत नसला तरी जिल्ह्यात तीन गावांमध्ये या आजाराची लक्षणे दिसून आले आहेत. यापूर्वीच जनावरांमधील लंपी चर्मरोगाचा वाढता प्रादुर्भाव पाहता त्याचे नियंत्रण करण्यासाठी अधिक प्रतिबंधात्मक उपाययोजना करण्याच्यादृष्टीने प्राण्यांमधील संक्रमण व सांसर्गिक रोगास प्रतिबंध व नियंत्रण अधिनियम, २००९ नुसार प्राप्त अधिकारांचा वापर करत राज्य शासनाने या रोगाबाबतीत संपूर्ण राज्य ‘नियंत्रित क्षेत्र’ म्हणून घोषित केले आहे.
दरम्यान सोलापूर जिल्ह्यामधील माळशिरस तालुक्यातील शेंगुर्णी या गावात दहा जनावर लंपी बाधित आढळले होते त्यानंतर माळशिरस तालुक्यातीलच मांडवे या ठिकाणी चार जनावरे लंपी बाधित आढळली आहेत. शेंगुर्णी या ठिकाणी पाच किलोमीटर परिसरातील 4570 जनावरांना लसीकरण झाले असून बाधित दहा जनावरे आता बरी झाली आहेत.
मांडवेच्या 5 किलोमीटर परिसरातील जनावरांना लसीकरणाचे काम सुरू झाले असून उत्तर सोलापूर तालुक्यातील नंदुर या गावी लंपी बाधित एक जनावर आढळले आहे त्यामुळे प्रशासन अलर्ट झाले असून तातडीने लसीकरण करण्याच्या सूचना देण्यात आले आहेत. लंपी वरील उपचारासाठी जिल्हाधिकाऱ्यांना जिल्हा नियोजन समिती मधून एक कोटी खर्च करण्याच्या सूचना राज्य सरकारने दिल्याची माहिती आहे.
जिल्हा परिषद दहा लाखाच्या सेस फंडातून दीड लाख लसी खरेदी करणार
सोलापूर जिल्हा परिषदेच्या सेस फंडात दहा लाख रुपयाच्या सुमारे एक लाख 58 हजार 70 लंपी वरील लस खरेदी करण्यात येणार आहे. तसेच तालुक्यातील पशुवैद्यकीय अधिकाऱ्यांना सेवाशुल्क मधून लस खरेदी करण्याच्या सूचना देण्यात आल्या आहेत. नंदुर येथील लंपी बाधित जनावर आढळले असले तरी घाबरून जाण्याचे कारण नाही, तातडीने त्याच्यावर लसीकरण करण्यात येणार असून चार ते पाच दिवसात जनावर बरे होते. आपले गोठे स्वच्छ ठेवा, जनावर बाधित आढळल्यास त्याचे विलगिकरण करावे अशी माहिती अतिरिक्त मुख्य कार्यकारी अधिकारी संतोष धोत्रे यांनी दिली.
