शरद पवारांचा काकांना फोन भेटायला या ! इकडे आमदार बापू काकांच्या भेटीला वडाळ्यात
सोलापूर : शरदचंद्र पवार राष्ट्रवादी काँग्रेसचे जिल्हाध्यक्ष पद गेल्यानंतर ज्येष्ठ नेते बळीराम काका साठे यांनी नाराज होऊन पक्ष सोडण्याची भूमिका मांडली त्यामुळे सोलापूरच्या राजकारणात बराच गोंधळ उडाला.
कार्यकर्ते आणि समर्थकांची बैठक घेऊन त्यांनी एकनाथ शिंदे यांच्या शिवसेनेत जाण्याचा निर्णय पक्का केला होता.
दरम्यान काका साठे यांनी जिल्हा परिषदेमध्ये पत्रकारांशी बोलताना थेट शरद पवार यांच्या भूमिकेवर नाराजी व्यक्त केली होती.
बुधवारी संजय पाटील घाटणेकर यांनी बारामती मध्ये जाऊन शरद पवारांची भेट घेतली आणि त्यांच्यासमोर सोलापूर जिल्ह्यातील गाऱ्हाणे मांडले. विशेष करून ज्येष्ठ नेते बळीराम काका साठे यांची नाराजी पक्षासाठी योग्य नाही, ते ज्येष्ठ आहेत त्यांना थांबवावे याबाबत आपण त्यांच्याशी बोलावे अशी विनंती केली. त्याचवेळी शरद पवार यांनी काका साठे यांना फोन लावून भेटायला या असे सांगितले. काका साठे यांना मी वाऱ्यावर सोडणार नाही असेही ते म्हणाले असल्याचे घाटणेकर यांनी सांगितले.
बुधवारी सकाळीच राज्याचे माजी सहकार मंत्री तथा दक्षिण विधानसभा मतदारसंघाचे आमदार सुभाष देशमुख यांनी वडाळ्यामध्ये जाऊन काका साठे यांची भेट घेतली. या भेटीची चर्चा सध्या सोलापूरच्या राजकारणात सुरू आहे.
काका साठे शरद पवार यांची भेट घेण्यासाठी गुरुवारी बारामती ला जाणार असल्याचे समजले. या भेटीनंतर काका साठी काय निर्णय घेतात याकडे संपूर्ण जिल्ह्याचे लक्ष लागले आहे.
