सोलापूर : सोमवारी आमदार प्रणिती शिंदे यांची आयुक्त शीतल तेली यांच्यासमवेत बैठक संपन्न झाली. या बैठकीमध्ये औद्योगिक वसाहत, अक्क्लकोट रोड येथील विविध समस्यांबाबत व सोलापूर शहरातील अमृत योजनेअंतर्गत झालेल्या ड्रेनेज लाईन कामानंतरच्या पॅचओव्हर बाबत आढावा बैठक संपन्न झाली.
या बैठकीमध्ये सोलापूरातील अक्क्लकोट रोड, औद्योगिक वसाहत येथे रस्ता, पाणी, स्ट्रीट लाईट, फायर ब्रिगेड, काट्याचे झाडे झुडपे, मच्छर, घंटागाडी, खुली जागा, ड्रेनेज लाईन इ. विविध समस्या असल्यामुळे कारखानदारांना अडचणी येत आहेत.
अमृत योजनेमधून शहरातील विविध भागामध्ये ड्रेनेज लाईन टाकण्याचे काम करण्यात आले आहे. ड्रेनेज लाईन झाल्यानंतर लगेचच खोदण्यात आलेला रस्ता दुरुस्त करून पॅचवर्कचे काम करणे गरजेचे होते. परंतू तसे झालेले नाही त्यामुळे पूर्ण रस्ताच खचून खराब झालेले निदर्शनास येत आहे. तसेच ड्रेनेज लाईनचे काम झाल्यानंतर बऱ्याच कालावधीने रस्त्याचे पॅचवर्कचे काम केले जात असून यामध्ये रस्त्याचा खचलेला भाग पूर्ण पॅचवर्क न करता ड्रेनेज लाईनकरीता खोदण्यात आलेल्या चारीचे काम करण्यात येत आहे. तसे न करता जितका रस्ता खचलेला आहे तेवढे पूर्ण काम करण्यात यावे व याकरीता अतिरिक्त निधी लागत असल्यास तो निधी सोलापूर महानगरपालिकेने उपलब्ध करून द्यावा. शहरातील बऱ्याच ठिकाणी ड्रेनेज लाईन करीता खोदण्यात आलेल्या रस्त्याच्या दुरुस्तीचे काम अद्याप हाती घेतलेले नाहीत ते देखील तात्काळ चालू करून पूर्ण करण्यात यावे.
सोलापूर शहरात गेल्या काही दिवसांपासून 5 ते 6 दिवसाआड पाणी पुरवठा केला जात आहे. सदयस्थितीमध्ये सोलापूर शहराला पाणी पुरवठा करण्याकरीता उपलब्ध असलेल्या स्त्रोतामध्ये मुबलक पाणी साठा आहे. पाणी पुरवठा करण्याकरीता मुबलक पाणी साठा असताना आणि शहराच्या पाणी पुरवठा वितरण केंद्रामध्ये शहरास एक दिवसाआड पाणी उपलब्ध होत असताना नियोजनाअभावी शहरातील नागरीकांना पाण्यापासून वंचित रहावे लागत आहे. त्यामुळे आपण आपल्या स्तरावर वरील सर्व बाबींचा आढावा घेवून शहरातील नागरीकांना एक दिवसाआड पाणी मिळण्याकरीताचे सुक्ष्म नियोजन करावे.
सोलापूर शहरामधील कुमठा नाका परिसरामध्ये कुष्ठरोग वसाहत आहे. या वसाहतीमध्ये कुष्ठरोग रुग्ण मोठ्याप्रमाणात वास्तव्यास आहेत. सदर रुग्णांना दरमहा रु. 1000 रुपये अर्थसहाय्य देण्यात येत होते. परंतू सद्यस्थितीमध्ये बंद करण्यात आले आहे. यामुळे त्यांना दैनंदिन उपजिविका भागविणे, उदरनिर्वाह करण्याकरीता व औषधोपचार यासाठी अनेक अडचणी निर्माण होत आहेत. त्यांच्यावर उपासमारीची वेळ येत आहे. यामुळे कुष्ठरोगांचे बंद असलेले प्रति महिना रु. 1000 रुपये अर्थसहाय्य लवकरात लवकर सूरू करण्यात यावे.
