सोलापूर : जिल्ह्यातील 189 ग्रामपंचायत निवडणुकीचे चित्र बुधवारी स्पष्ट झाले. दक्षिण सोलापूर तालुक्यातील 17 ग्रामपंचायत निवडणुकी पैकी मंद्रुप व निंबर्गी गावच्या निवडणुकीने संपूर्ण तालुक्याचे लक्ष वेधून घेतले आहे. सरपंच पद हे थेट असल्याने निवडणुकीला महत्व प्राप्त झाले आहे.
निंबर्गी ग्रामपंचायत निवडणुकीचे चित्र बुधवारी स्पष्ट झाले, सरपंच पदासाठी थेट दुरंगी लढत होत असून काँग्रेस नेते सुरेश हसापुरे यांचे चिरंजीव श्रीदीप हसापुरे उमेदवार असल्याने त्यांची प्रतिष्ठा पणाला लागली असून भाजपचे आमदार सुभाष देशमुख पुरस्कृत चन्नप्पा बोरगी हे उमेदवार रिंगणात असल्याने ही लढत लक्षवेधी मानली जात आहे.
सरपंच पदासाठी 7 जणांनी उमेदवारी अर्ज दाखल केले, त्यात चन्नप्पा बोरगी, श्रीदीप हसापुरे, त्यांचे चुलते रमेश हसापुरे, पत्रकार आप्पासाहेब हत्ताळे, शेख हुसेनी सय्यद, अशपाक मुल्ला यांचा समावेश होता. त्यात उमेदवारी अर्ज मागे घेण्याच्या दिवशी 5 जणांनी माघार घेतली. शेवटच्या क्षणी पुतण्या श्रीदीप साठी रमेश हसापुरे यांनी माघार घेतली. पत्रकार हत्ताळे यांनी ही माघार घेत प्रभाग 1 मध्ये आपला अर्ज त्यांनी ठेवला आहे.
दक्षिण सोलापूर मतदारसंघाचे आमदार सुभाष देशमुख यांनी सर्वत्र लक्ष घातल्याने ही निवडणूक चुरशीची झाली आहे. दक्षिण तालुक्यातील हसापुरे विरोधकांनी निंबर्गी गावात सभा घेतल्या आहेत. यापूर्वी पारंपरिक विरोधक असलेले बिराजदार-हसापुरे गट या निवडणुकीत एकत्र आल्याने श्रीदीप हसापुरे यांचा विजय निश्चित मानला जात आहे.
