भाजपची तिसरी यादी जाहीर ; माळशिरस मधून राम सातपुते देणार मोहिते पाटलांना टक्कर
सोलापूर : भारतीय जनता पार्टीची विधानसभा निवडणुकीसाठी तिसरी उमेदवारांची यादी जाहीर झाली असून त्या यादीमध्ये सोलापूर माळशिरस या विधानसभा मतदारसंघातून पुन्हा विद्यमान आमदार राम सातपुते यांना उमेदवारी देण्यात आली आहे.
त्यामुळे भाजपचे रामभाऊ पुन्हा एकदा मोहिते पाटलांना टक्कर देण्यासाठी सज्ज झाले आहेत.
नुकत्याच झालेल्या लोकसभा निवडणुकीमध्ये सोलापूर राखीव मतदार संघातून आमदार राम सातपुते यांना उमेदवारी देण्यात आली होती. परंतु त्यांचा पराभव झाला. त्यामुळे राम सातपुते हे शहर मध्य या मतदारसंघातून उमेदवार होतील अशी चर्चा सुरू झाली पण या ठिकाणी देवेंद्र कोठे यांना उमेदवारी दिली आहे.
आता राम सातपुते यांचे काय असा प्रश्न उपस्थित झाला पण सातपुते यांनी आपल्या हक्काच्या माळशिरस मतदारसंघातून निवडणूक लढवण्याचा निश्चय केला होता त्याप्रमाणे भारतीय जनता पार्टीने सातपुते यांना माळशिरस मधून उमेदवारी जाहीर केली आहे. त्यामुळे उत्तम जानकर आणि राम सातपुते यांच्यात काटे की टक्कर पाहायला मिळेल हे नक्की.
