सोलापूर : शहर काँग्रेसच्या अध्यक्षपदी निवड झाल्यानंतर चेतन नरोटे यांचे सोलापुरात पुणे नाक्यावर जंगी स्वागत करण्यात आले. त्यावेळी त्यांची भव्य मिरवणूक काढण्यात आली. शहरातील सर्व महापुरुषांना अभिवादन करून त्यांनी काँग्रेस भवनाला भेट दिली.
यावेळी मावळते अध्यक्ष प्रकाश वाले यांनी त्यांचे स्वागत केले, त्यांना अध्यक्षपदाच्या खुर्चीवर बसवले. ज्येष्ठ नेते सुशीलकुमार शिंदे व आमदार प्रणिती शिंदे यांच्या उपस्थितीत मोठा सत्कार समारंभ घेऊन ते पदभार स्वीकारणार असल्याची माहिती मिळाली.
सोमवारी सकाळी साडे दहा वाजता अध्यक्ष नरोटे हे काँग्रेस भवनात दिसून आले. रोज सकाळी साडे दहा ते दुपारी 1 पर्यंत आपण काँग्रेस भवनात राहणार असल्याचे सांगताना सर्व प्रभागात बैठका व पक्षाचा आढावा घेणार असल्याची भूमिका त्यांनी बोलून दाखवली.
काँग्रेस पक्षाला चेतन नरोटे यांच्या रुपात आक्रमक शहर अध्यक्ष मिळाला आहे. सध्या मुख्यमंत्री एकनाथ शिंदे यांच्या गटात दाढीवाल्यांची जोरदार चर्चा आहे, त्यातच नरोटे हे सुद्धा दाढीवाले असल्याने त्याची ही सध्या शहरात चर्चा आहे. स्वर्गीय विष्णुपंत कोठे यांच्या तालमीत तयार झालेल्या नरोटे यांच्याकडून काँग्रेसला मोठी अपेक्षा असून आगामी सोलापूर महानगरपालिकेची निवडणूक ही नरोटे यांच्या अध्यक्षपदाची खरी परीक्षा असणार आहे हे मात्र निश्चित.
