सोलापुरात संघाची चिंतन बैठक ; आमदार विजय देशमुख यांच्या गैरहजेरीची सर्वाधिक चर्चा ; काय घडले….
लोकसभा निवडणुकीत झालेल्या पराभवानंतर विधानसभा निवडणुकीच्या पार्श्वभूमीवर सोलापुरात बाळासाहेब राष्ट्रीय स्वयंसेवक संघ आणि भारतीय जनता पार्टी समन्वयाची महत्त्वपूर्ण बैठक हरीभाई देवकरण प्रशाला या ठिकाणी पार पडली.
या बैठकीनंतर भारतीय जनता पार्टीच्या कार्यकर्त्यांमध्ये बैठकीला दांडी मारणाऱ्या आमदार विजयकुमार देशमुख यांची चर्चा ऐकण्यास मिळत आहे.
विधानसभा निवडणुकीच्या पार्श्वभूमीवर सकाळी आठ वाजल्यापासून दुपारी दोन वाजेपर्यंत हरीभाई देवकरण प्रशाला येथे पार पाडली. ही बैठक अत्यंत महत्त्वाची असून या बैठकीला सर्व लोकप्रतिनिधींनी आणि प्रमुख कार्यकर्त्यांनी शंभर टक्के उपस्थित राहणे अनिवार्य असल्याची सक्त सूचना राष्ट्रीय स्वयंसेवक संघ आणि भारतीय जनता पार्टीच्या वरिष्ठांनी दिलेली असताना या बैठकीला आमदार विजयकुमार देशमुख हे गैरहजर असल्याचे दिसून आले.
या बैठकीला संघाचे पुणे विभागीय कार्यवाह मुकुंदराव कुलकर्णी, प्रवीण दबडगावकर, आमदार सुभाष देशमुख, आमदार सचिन कल्याणशेट्टी, आमदार राम सातपुते, माजी महापौर शोभा बनशेट्टी, शहराध्यक्ष नरेंद्र काळे, मध्य विधानसभा मतदारसंघांमध्ये इच्छुक असलेले पांडुरंग दिंड्डी, दक्षिण मतदार संघामध्ये इच्छुक असलेले उदय पाटील आदी इच्छुक आणि दावेदार आमंत्रित होते.
काही कार्यकर्त्यांकडून मिळालेल्या माहितीनुसार या बैठकीच्या ठिकाणी आमदार विजयकुमार देशमुख यांच्या गैरहजेरीची फार मोठ्या प्रमाणात चर्चा रंगली. तिथेच शहर उत्तर मधल्या एका जबाबदार स्वयंसेवकाने अशा बैठकींना मालक महत्त्व देत नाहीत अशी नाराजी व्यक्त केली.
संघ परीवाराची इतकी महत्वाची प्रदेश पातळीवरील नेत्यांसह बैठक सोलापुरात असूनही उपस्थित रहात नाहीत, संघाचे स्वयंसेवक व परिवारातील कार्यकर्ते लोकसभा असो की विधानसभा जणू आपल्या घरात लग्नकार्य असल्यासारखे पळतात, देव, देश धर्मासाठी निस्वार्थ भावनेने काम करतात मात्र संघटनेच्या व हिंदुत्ववादी कार्यकर्त्यांच्या बळावर लोकप्रतिनिधी झालेले लोक मात्र स्वतःला मालक समजू लागलेत. ही बैठक आहे ती माझ्यासाठी नाही, मी वेगळी स्वतंत्र बैठक लावेन आणि संपूर्ण संघालाच माझ्याकडे चर्चेला बोलावून घेईन ही भूमिका माध्यमांकडे कधीही न व्यक्त होणारे आमदार डायरेक्ट प्रेसला व्यक्त करतात ! त्यांच्या या गैरहजेरीचं आता संघ श्रेष्ठी आणि भाजपा श्रेष्ठी नेमकी कशी दखल घेतात हे बघावे लागेल असा एक ज्येष्ठ कार्यकर्ता हताशपणाने बोलताना दिसला.
याच वेळी साखर पेठेतील एका संघ स्वयंसेवकाने साखर पेठेच्या जागेवरती वक्फ बोर्डाने नाव लावले आणि ती जागा वक्फ बोर्डाची आहे. महानगरपालिकेकडून येथील नागरिकांना बांधलेले घर तर सोडा, साध्या घराच्या किरकोळ दुरुस्तीची सुद्धा परवानगी देत नाही . ही तक्रार घेऊन शहर उत्तरचे आमदारांकडे गेले असता शहर उत्तरचे आमदार यांनी त्याकडे दुर्लक्ष केले अशी ही नाराजी व्यक्त करण्यात आल्याचे समजते.
आमदार विजय देशमुख यांना महत्त्वाचे काम असल्याने ते या बैठकीला येऊ शकले नाहीत अशी माहिती ही समोर आले आहे दरम्यान यावर विजयकुमार देशमुख समर्थकांकडून प्रतिक्रिया देताना भाजपात नव्याने दाखल झालेले लोक मात्र या बैठकीला आम्ही कसे उपस्थित होतो आणि आमच्याकडे कसे लक्ष केंद्रित होईल हे सांगण्यासाठी धडपड केल्याचा टोला हाणला.
