सोलापूर : काँग्रेसचे राष्ट्रीय नेते राहुल गांधी यांची खासदारकी भारतीय जनता पार्टीने सूडबुद्धीने रद्द केली. त्या पार्श्वभूमीवर संपूर्ण देशभरात काँग्रेस भाजपच्या विरोधात लढा देत आहे. एकीकडे अशी परिस्थिती असताना दुसरीकडे सोलापुरात युवक काँग्रेसला गटबाजीची ‘वाळवी’ लागल्याचे चित्र पाहायला मिळत आहे. ही वाळवी हळूहळू पोखरत चालल्याचं दिसून येतंय.
युवक काँग्रेस मधील गटबाजी ही 2021 मध्ये झालेल्या युवक काँग्रेसच्या निवडणुकीत पाहायला मिळाली. तत्कालीन युवक अध्यक्ष अंबादास करगुळे यांनी आपल्या गटातील काही समर्थकांना या निवडणुकीला उभे केले होते. करगुळे यांनी आपलं वय कमी दाखवून पुन्हा अध्यक्ष होण्याचा प्रयत्न केला मात्र त्यांना कागदोपतत्री जमले नाही. त्यांनी आपल्या समर्थकांना काही ठिकाणी उभे केले. शहर मध्य युवक काँग्रेस अध्यक्षसाठी एमआयएमला सोडून काँग्रेसच्या आश्रयाला आलेले वाहिद बिजापुरे हे विजयी झाले. शहर युवक काँग्रेसच्या अध्यक्षपदावर गणेश डोंगरे विराजमान झाले.
मागील काही महिन्यांपासून शहराध्यक्ष गणेश डोंगरे आणि शहर मध्य युवक अध्यक्ष वाहीद विजापुरे यांच्यात काही जमत नसल्याचे चित्र आहे. ते दोघे एकमेकांच्या आंदोलनाला बोलवले जात नसल्याची माहिती समोर आली आहे. काही दिवसांपूर्वी मुंबईमध्ये युवक काँग्रेसच्या वतीने विधानसभेला घेराव घालण्यात आला होता. त्यावेळी गणेश डोंगरे यांचा स्वतंत्र गट तर वाहिद विजापूरे यांचे कार्यकर्ते वेगवेगळ्या पद्धतीने गेल्याचे पाहायला मिळालं. सोलापुरात युवक काँग्रेसचे आंदोलने होतात ज्या ठिकाणी गणेश डोंगरे असतात तिथे वाहिद बिजापुरे नसतात ज्याठिकाणी वाहिद बिजापुरे आंदोलन करतात तिथे गणेश डोंगरे दिसून येत नाहीत.
शहराचे अध्यक्ष चेतन नरोटे यांच्यापर्यंत हा विषय काही कार्यकर्त्यांनी घातला त्यांनी ही दोघांना समजावण्याचा प्रयत्न केल्याचे समजते. परंतु एकीकडे पक्ष आणि प्रमुख नेते असे अडचणीतून जात असताना कार्यकर्त्यांमध्ये एकी असणे गरजेचे आहे या विषयात सोलापूरच्या सर्वेसर्वा आमदार प्रणिती शिंदे यांनी लक्ष घालण्याची गरज असल्याचे बोलले जात आहे. ताईंनी एकदा डोळे ‘वटारले’ तर निश्चितच हे दोघे ‘वाळणीवर’ येतील अशीही काँग्रेस भवनात चर्चा सुरू आहे.
