सोलापूर : दक्षिण सोलापूर तालुका एकेकाळचा काँग्रेसचा बालेकिल्ला परंतु, मागच्या दहा वर्षापासून या बालेकिल्ल्याला राज्याचे माजी सहकार मंत्री सुभाष देशमुख यांनी सुरुंग लावला. स्वर्गीय माजी मंत्री आनंदराव देवकते यांच्यानंतर या तालुक्याला नेतृत्व मिळाले नाही. तालुक्यातील दुसऱ्या फळीतील नेते यांच्यात नेतृत्व करण्याची धमक नसल्याचे चित्र आहे.
काँग्रेसमधील गटबाजी याला कारणीभूत दिसून येते. दक्षिण तालुक्याचे नेतृत्व आता वरिष्ठ उपाध्यक्ष सुरेश हसापुरे यांच्याकडे जात असल्याचे राजकीय चित्र आहे. संपूर्ण सोलापूर जिल्ह्यात मोहिते पाटील यांचे समर्थक म्हणून ओळख असणाऱ्या हसापुरे यांचे आता शिंदे दरबारी चांगलेच वजन वाढताना पहावयास मिळते.
हसापुरे हे काँग्रेसमध्ये आल्यापासून माजी केंद्रीय गृहमंत्री सुशीलकुमार शिंदे आणि आमदार प्रणिती शिंदे यांच्या अतिशय जवळचे ते कार्यकर्ते समजले जातात. सर्वपक्षीय मित्र म्हणून ओळख असणाऱ्या हसापुरे यांनी आपल्या बुद्धीच्या जोरावर अनेकांना मोठमोठी पदे मिळवून देण्यात सिंहाचा वाटा उचलला हे कोणीही नाकारत नाही. आक्रमक स्वभाव म्हणून परिचित असणाऱ्या आमदार प्रणितीताईंच्या विश्वासातील हसापुरे आहेत.
सुशीलकुमार शिंदे हे सोलापूर दौऱ्यावर आल्यानंतर त्यांच्या गाडीमध्ये केवळ दोनच चेहरे पाहायला मिळतात. एक म्हणजे शहराचे अध्यक्ष चेतन नरोटे आणि दुसरे म्हणजे वरिष्ठ उपाध्यक्ष सुरेश हसापुरे. त्यावेळी शिंदे साहेबांच्या तोंडून ‘सुरेशराव बसा गाडीत’ हे शब्द निश्चितच ऐकण्यास मिळतील. हे पाहून दक्षिण मधल्या काँग्रेसच्या काही नेत्यांना पोटदुखी होत असल्याची मजेदार चर्चा रंगली आहे.
‘भारत जोडो’ यात्रेत आमदार प्रणिती शिंदे या राहुल गांधी यांच्या सोबत राहिल्याने ताईंचे वजन गांधी परिवारात वाढले आहे. सोलापूर जिल्ह्याची संपूर्ण जबाबदारी आता ताईंकडे देण्यात आलीय. कुणाचा प्रवेश असेल, अथवा उमेदवारी असेल आता ते ताईंच्या ‘एनओसी’शिवाय शक्य नसल्याची माहिती समोर आली आहे. साहेब आणि ताईंनी निश्चय केला तर भविष्यात विधानसभेसाठी दक्षिणमधून काँग्रेसचे उमेदवार म्हणून सुरेश हसापुरे हे दिसले तर नवल वाटू नये.
