सोलापूर : अनेक दिवसांपासून संपूर्ण सोलापूर जिल्ह्याचे लक्ष लागलेल्या सोलापूर जिल्हा परिषद निवडणुकीचे आरक्षण गुरुवारी अखेर जाहीर झाले. विद्यमान अनेक दिग्गज नेत्यांना या आरक्षणाचा फटका बसला असून त्यांचे मतदारसंघ महिलेसाठी राखीव झाले आहेत.
यामध्ये जिल्हा परिषद जेष्ठ सदस्य काका साठे, राष्ट्रवादीचे प्रदेश प्रवक्ते उमेश पाटील, जिल्हा परिषदेचे अध्यक्ष अनिरुद्ध कांबळे, माजी पक्षनेते आनंद तानवडे, अण्णाराव बाराचारे, अर्थ व बांधकाम सभापती विजयराज डोंगरे, भारत शिंदे, वसंतराव देशमुख, मल्लिकार्जुन पाटील या नेत्यांना आपले मतदार संघ आरक्षित झाल्याने त्यांचे अडचण झाले आहे मात्र यामध्ये माजी उपाध्यक्ष दिलीप चव्हाण, माजी समाज कल्याण सभापती शीला शिवशरण, बार्शीचे मदन दराडे, बार्शीच्या रेखा राऊत यांच्यासाठी पुन्हा जिल्हा परिषदेत येण्यासाठी मार्ग मोकळे झाल्याचं चित्र आहे.
माजी जिल्हा परिषद सदस्य सुरेश हसापुरे यांचा मात्र चांगलाच हिरमोड झाला आहे. दक्षिण सोलापूर तालुक्यातील सातही जिल्हा परिषदेचे गट महिलांसाठी राखीव झाल्याने त्या तालुक्यातील धनेश अचलारे, अमर पाटील, यतीन शहा, रामप्पा चिवडशेट्टी, अप्पाराव कोरे, विजय राठोड, श्रीशैल नरोळे, भीमाशंकर जमादार, हणमंत कुलकर्णी यांची अडचण झाली आहे.
उत्तर तालुक्यात तिन्ही जागा सर्वसाधारण झाल्याने तिथे मोठी चुरस पाहायला मिळेल. राष्ट्रवादी काँग्रेसचे ज्येष्ठ नेते जिल्हाध्यक्ष काका साठे यांना मात्र ओपन महिला झाल्याने पाच वर्षे थांबावे लागणार आहे. दिलीप माने व काका साठे युती झाल्यास तिन्ही जागेवर त्यांचा विजय होईल आणि पंचायत समिती सुद्धा ताब्यात येईल असे चित्र आहे.
सोलापूर जिल्हा परिषदेत आनंद तानवडे, मदन दराडे, अरुण तोडकर यांच्यात चांगलीच मैत्री होती, त्यातील तोडकर यांचा मतदारसंघ नगरपालिका झाल्याने त्यांना पुन्हा संधी नाही. त्यातच दराडे यांचा उपळे दुमाला हा मतदारसंघ सर्वसाधारण साठी खुला झाल्याने त्यांना पुन्हा संधी निर्माण झाली आहे. परंतु त्यांचे मित्र तानवडे यांचा मतदारसंघ महिलेसाठी खुला झाल्यान१ तानवडे यांचा जिल्हा परिषदेत पुन्हा येण्याचे स्वप्न भंगले म्हणून दराडे यांच्या ‘आनंदावर’ विरजण पडले.
मंगळवेढ्याचे माजी उपाध्यक्ष दिलीप चव्हाण यांचा भोसे मतदारसंघ पुन्हा सर्वसाधारण झाल्याने त्यांना पुन्हा संधी मिळेल का याकडे लक्ष असून माजी समाज कल्याण सभापती शिला शिवशरण यांच्या बाजूचा संत चोखामेळा नगर हा मतदारसंघ अनुसूचित जाती महिलेसाठी राखीव झाला आहे तिथून त्या पुन्हा जिल्हा परिषदेला उभारण्याची दाट शक्यता आहे. नितीन नकाते यांचा संत दामाजी नगर हा मतदारसंघ ही महिलेसाठी राखीव झाल्याने त्यांची अडचण झाली आहे.
अक्कलकोट तालुक्यातून माजी मंत्री सिद्धाराम म्हेत्रे यांच्या कन्या जिल्हा परिषदेला उभारणार असल्याचे बोलले जात आहे. चपळगाव हा गट ओबीसी सर्वसाधारण झाल्याने तिथे कल्याणशेट्टी यांच्या घरातील सदस्य झेडपीत येण्याची पुन्हा शक्यता नाकारता येत नाही. माजी सभापती मल्लिकार्जुन पाटील यांचाही गट महिलेसाठी राखीव झाला आहे.
पंढरपूर तालुक्यातील रोपळे हा गट खुला झाल्याने विद्यमान जिल्हा परिषद सदस्य प्रा.सुभाष माने यांना पुन्हा संधी आहे. करकंब हा महत्वाचा गट ओबीसी महिलेसाठी राखीव झाल्याने इथून इच्छुक असलेले माजी सरपंच आदिनाथ देशमुख यांचा मात्र चांगलाच हिरमोड झाला. जिल्हा परिषदेत येण्याची त्यांची जबर इच्छा होती.
करमाळ्याचे अध्यक्ष अनिरुद्ध कांबळे यांना नेतेमंडळी पुन्हा संधी दिल्यास ते पुन्हा झेडपीत पहायला मिळतील अशी शक्यता आहे. कारण तब्बल तीन मतदारसंघ हे अनुसूचित जाती साठी राखीव झाले आहेत. केम मतदारसंघातून झेडपीत येण्याची इच्छुक असलेले अजित तळेकर यांचाही हिरमोड झाला असून तो गट महिलेसाठी राखीव झाला आहे त्याजागेवर ते कुणाला उभा करतात याची उत्सुकता आहे.
