सोलापूर : वीस वर्षे जन्मठेपेची शिक्षा भोगून जेल मधून सुटल्यानंतर आरोपीने पुन्हा दागिने चोरी केल्याने पोलिसांनी त्या आरोपीला पकडून त्याच्याकडून चार लाख पन्नास हजारांचे चोरीचे दागिने जप्त केले. विशेष म्हणजे कुमार करजगी यांच्या घरातील माळी काम करणारा कामगारच चोर निघाला आहे.
रवीकुमार उर्फ रमेशकुमार अँब्लेसप्पा कुरबा (वय-४८,रा. एमपीएसएल कॉलनी, अशापुर रोड, राजमाता मंदिर, रायचूर, राज्य- कर्नाटक) असे आरोपीचे नाव आहे. कुमार शंकर करजगी यांच्या घरी दि. २९ नोव्हेंबर रोजी बेडरूममधील शोकेसवर ठेवलेले नऊ तोळे वजनाचे सोन्याचे दागिने चोरी झाल्याची घटना घडली होती. त्यावेळी कुमार करजगी यांनी त्यांच्या घरी कामास ठेवलेला इसम रवीकुमार उर्फ रमेशकुमार अँब्लेसप्पा कुरबा याच्याविरुद्ध फौजदार चावडी पोलीस ठाण्यात फिर्याद दाखल केली होती. त्यानुसार गुन्हा दाखल झाला होता.
चोरी झालेल्या दिवशी कुरबा याचा शोध घेतला,परंतु तो मिळून आला नाही. त्यानंतर रवीकुमार याला मोबाईल फोनद्वारे संपर्क साधला असता त्यावेळी देखील संपर्क झाला नाही. दरम्यान पोलिसांना या गुन्ह्यातील आरोपी रवीकुमार उर्फ रमेशकुमार अँब्लेसप्पा कुरबा हा भैय्या चौक रेल्वे स्टेशन परिसरात आल्याची माहिती मिळाली.
त्यानुसार सहाय्यक पोलीस निरीक्षक संदीप पाटील व त्यांच्या पथकातील पोह. श्रीकांत पवार, विजयकुमार वाळके, राहुल तोघे, गणेश शिंदे यांनी सापळा लावून रविकुमार याला तात्काळ ताब्यात घेतले. त्यानंतर गुन्हे शाखेचे वरिष्ठ पोलीस निरीक्षक सुनील दोरगे यांच्या मार्गदर्शनाखाली रविकुमार यांच्याकडे तपास केला. त्याने चोरी केलेले चार तोळे वजनाच्या तीन सोन्याच्या अंगठ्या व पाच तोळे वजनाचे लिंग असा एकूण ४ लाख ५० हजार रुपये किमतीचे दागिने कोल्हापूर येथे वास्तव्यास असलेल्या लॉजमध्ये ठेवल्याचे कबूल केले. तपास पथकाने ते दागिने जप्त केले.
वीस वर्षाची जन्मठेपेची शिक्षा भोगून सुटल्यानंतर रवीकुमार याच्याकडे आधार कार्ड नसल्याने त्याला कोणी कामावर ठेवून घेत नव्हते. मात्र माणुसकीच्या नात्याने कुमार करजगी यांनी रविकुमार याला माळी कामासाठी महिनाभरापूर्वी कामावर ठेवले होते. परंतु माळी कामासाठी ज्या कामगाराला काम दिले, तोच कामगार चोर निघाला.
