सोलापुरात तीन शेळ्यांचा आगीत होरपळून मृत्यू ; भीषण आगीत एक दुकान चार घरांचे नुकसान
सोलापूर – नई जिंदगी परिसरात असलेल्या हद्दवाढ भागातील नागनाथ नगरात शनिवारी भीषण आग लागली होती. होटगी रोड विमानतळामागे बेकायदेशीर वसाहत असलेल्या नागनाथ नगरात आगीचे तांडव पाहायला मिळाले. नागनाथ नगरातील भीषण आगीत एक दुकान व चार घरांना शनिवारी सकाळी सात ते साडेसातच्या सुमारास अचानक आग लागली.
नागनाथ नगर हे होटगी रोड विमानतळामागे बेकायदेशीरपणे निर्माण करण्यात आले आहे. कोणत्याही प्रकारचे ले आऊट किंवा महानगरपालिका प्रशासनाची मंजूरी न घेता नागनाथ नगर वसाहत निर्माण करण्यात आली आहे. नागनाथ नगर मध्ये आतील बाजूस असलेले रस्ते देखील योग्य नाहीत. आपत्कालीन घटना घडल्यास शासकीय मदत मिळण्यास किंवा शासकीय वाहन जाण्यासाठी योग्य रस्ता देखील नागनाथ नगर मध्ये नाही.
नागनाथ नगर येथे आग लागल्याची माहिती मिळताच सोलापूर अग्नीशामक दलाची यंत्रणाही तत्काळ धाऊन आली. अग्निशामक दलाचे अधीक्षक केदार आवटे यांच्या अधिपत्याखाली पाण्याचे बंब वापरून आगीवर नियंत्रण मिळविण्यात आले आहे. या आगीत कोणत्याही प्रकारची जीवितहानी झाली नसून एका गोडाऊन मध्ये बांधलेल्या तीन शेळ्याचा मृत्यू झाला आहे. आग विजविण्यात आली असून घटनास्थळी अग्नीशामक दलाचे जवान पंचनामा करत आहे.
