तौफिक शेख – फारुक शाब्दी यांनी एकमेकांना दिला सन्मान ; महेश कोठे आडम मास्तरांनी तर एकमेकांना पाहिले पण नाही
सोलापूर : राजकारणात अनेक जण एकमेकांचे शत्रु -मित्र पाहायला मिळतात. काहींचे वैचारिक मतभेद असतात तर काहीजण एकमेकांचे राजकीय कट्टर विरोधक असतात पण काही सार्वजनिक कार्यक्रमात एकमेकांचे राजकीय विरोधक असले तरी एकमेकांना सन्मान हे देतानाचे चित्र पाहायला मिळते.
सोलापुरातील लोकप्रधान या न्यूज नेटवर्कचा चौथा वर्धापन दिन बुधवारी मोठ्या उत्साहात संपन्न झाला. सर्वपक्षीय नेत्यांनी या कार्यक्रमाला उपस्थिती लावली. याच कार्यक्रमाला माजी आमदार आडम मास्तर, माजी महापौर महेश कोठे, माजी नगरसेवक तौफिक शेख, एमआयएम पक्षाचे शहराध्यक्ष फारुक शाब्दी, एम के फाउंडेशनचे महादेव कोगनुरे, काँग्रेसचे शहराध्यक्ष चेतन नरोटे, राष्ट्रवादीचे नेते सुधीर खरटमल, माजी महापौर आरिफ शेख, माजी नगरसेविका श्रीदेवी फुलारे यांच्यासह नेते मंडळी मोठ्या संख्येने उपस्थित होती.
तौफिक शेख व फारूक शाब्दी यांचे वैचारिक मतभेद असतानाही त्या दोघांनी एकमेकांना सन्मान दिल्याचे पाहायला मिळाले. यात सुधीर खरटमल यांचीही मध्यस्थी दिसून आली. एकीकडे असे चित्र असताना आडम मास्तर यांना पुरस्कार दिला जात होता, तेव्हाच महेश कोठे यांचे स्टेजवर आगमन झाले पण कोठे त्या फ्रेम मध्ये गेले नाहीत, आडम खाली जात असताना कोठे आणि मास्तरांनी एकमेकांना साधे पाहिले सुद्धा नाही.
