राष्ट्रवादीच्या ‘ काकां’कडे सर्व गुन्हे माफ असतात…..!
सोलापूर : राष्ट्रवादी काँग्रेस मध्ये ‘काका – पुतण्या’चा वाद जगजाहीर आहे. पक्ष सोडून गेलेल्या अनेकांना काका शरद पवार हे त्याची चूक विसरून माफ करत असल्याचे अनेक वेळा पाहायला मिळाले आहे.
असाच एक प्रकार सोलापूर मध्ये ही घडला होता.
प्रदेशाध्यक्ष जयंत पाटील हे सोलापूर दौऱ्यावर आले असता पोस्टरवर आपला फोटो नसल्याने कार्यालयीन सरचिटणीस महेश माने या कार्यकर्त्यांनी काही वेळापूर्वी नाराजी व्यक्त केली होती. आम्हाला सन्मान नसेल तर आम्ही पक्षात रहावे का असा प्रश्न उपस्थित करून आपली नाराजी बोलून दाखवली. त्यानंतर त्याने मेळावा सुरू असलेल्या सुशील रसिक सभागृहात खुर्च्या फेकाफेकी केली. जिल्हाध्यक्ष बळीराम काका साठे यांनी त्याला थांबवण्याचा प्रयत्न केला परंतु माने यांनी काका साठे यांच्यासोबत हुज्जत घातली. रागाला आलेल्या साठे यांनी “जा बाबा तू पक्ष सोडून” म्हणून आपला राग व्यक्त केल्याचे पाहायला मिळाले.
त्यानंतर काका साठे हे माने यांच्यावर बरेच चिडलेले दिसून आले. एका महिन्या नंतर मंगळवारी माने हे जिल्हा परिषदेमध्ये काका बसतात त्या कार्यालयात आले आणि त्यांनी काकांचे चरण स्पर्श करत आशीर्वाद घेतला, तेव्हा दोघांच्या चेहऱ्यावर हसू दिसले. तिथे उपस्थित असलेल्या पत्रकारांनी तो फोटो घेतला अन् हा काय प्रकार असे विचारले.
“महेश आपलाच आहे, तो चुकला त्याने चूक कबूल केली, पवार साहेबांकडे जाऊन माफी मागितली, साहेबांचे मन मोठे आहे, त्यांनी माफ केले असे साठे यांनी सांगितले. यावरून स्वतःला निष्ठावंत म्हणणारे महेश माने पुन्हा काकांच्या नेतृत्वाखाली सक्रिय झाल्याचे पाहायला मिळाले.
