आमदार सुभाष देशमुख, सचिन कल्याणशेट्टी व
समाधान आवताडे यांच्या मागणीला यश ; भीमा नदीकाठच्या गावांना दररोज ६ तास वीजपुरवठा
भीमा नदीमध्ये पिण्यासाठी उजनी धरणातून पाणी सोडले आहे. मात्र, नदीकाठचा विद्युत पुरवठा फक्त दोनच तास सुरू असून त्यामुळे शेतकऱ्यांनी विद्युत पुरवठा सुरळीत करण्याची मागणी केली होती.
भीमा नदीकाठच्या वीज पुरवठ्या संदर्भात आमदार समाधान आवताडे यांनी तत्काळ जिल्हाधिकारी कुमार आशीर्वाद यांना संपर्क करून दररोज ८ तास वीजपुरवठा सुरू करण्याची मागणी केली होती व तसेच आ.सुभाष देशमुख, आ. सचिन कल्याणशेट्टी व आ.समाधान आवताडे यांनी राज्याचे उपमुख्यमंत्री व उर्जा मंत्री देवेंद्र फडणवीस यांच्याकडेही वीज पुरवठा सुरळीत करण्याची मागणी केली होती. या मागणीची दखल घेत त्यांनी जिल्हाधिकार्यांशी चर्चा केली असता चर्चेअंती दररोज ६ तास वीजपुरवठा करण्याचा मार्ग निघाला. जिल्हा प्रशासनाने याची तात्काळ दखल घेत आता नदीकाठच्या गावांना दररोज 6 तास वीज पुरवठा करण्याच्या आदेशाची अंमलबजावणी करण्याच्या सूचना जिल्हाधिकारी कुमार आशीर्वाद यांनी दिल्या आहेत.
उजनीतून पाणी सोडल्यानंतर भीमा नदीवरील सर्व बंधारे भरून घेण्यात आले. मात्र, पिण्यासाठीच्या पाणीपुरवठा योजना असलेल्या बंधारा परिसरातील शेतीला केवळ दोन तास वीजपुरवठा केला जात आहे. त्यामुळे शेतकऱ्यांनी वीजपुरवठा सुरळीत करावा, अन्यथा लोकसभा निवडणुकीवर बहिष्कार टाकण्याचा इशारा दिला होता.
दरम्यान आ. सुभाष देशमुख, आ.सचिन कल्याणशेट्टी व आ. समाधान आवताडे यांनी नदीकाठचा वीजपुरवठाबाबत देवेंद्र फडणवीस यांना सांगितले असता त्यांनी वीजपुरवठा सुरळीत करण्यासाठी जिल्हाधिकार्यांशी चर्चा केली होती व चर्चेअंती सकारात्मक व शेतकर्यांना दिलासा देणारा मार्ग निघाला.
सध्या नदीकाठच्या या भागातील शेतीच्या पाण्यासाठी अडचण झाली आहेच, पण त्याही पेक्षा अधिक जनावरांच्या पिण्याच्या पाण्यासाठी वणवण करण्याची वेळ आली आहे. आता वीजपुरवठा सुरळीत झाल्याने शेतकऱ्यांचा प्रश्न मार्गी लागला आहे. तसेच आमदार महोदयांनी शेतकऱ्यांच्या प्रश्नांची तत्काळ दखल घेऊन त्याची सोडवणूक केल्यामुळे शेतकऱ्यांमधून समाधान व्यक्त केले जात आहे.
