किसन जाधव अदितीताईंच्या सत्काराला रायगड मध्ये ; वाढदिनी शुभेच्छा देत केली हि मागणी
सोलापूर – महाराष्ट्र राज्याच्या महिला व बालकल्याण मंत्री तथा रायगड जिल्ह्याचे पालकमंत्री आदिती तटकरे यांचा वाढदिवसानिमित्त राष्ट्रवादी काँग्रेस पार्टीचे प्रदेश उपाध्यक्ष तथा ईच्छा भगवंताची परिवाराचे मार्गदर्शक किसन जाधव यांनी रायगड जिल्ह्यातील सुतारवाडी येथील गीताबाग या निवासस्थानी त्यांना आगळ्यावेगळ्या शुभेच्छा दिल्या.
आदिती तटकरे यांची भेट घेऊन त्यांच्या वाढदिवसानिमित्त राष्ट्रवादी काँग्रेस पार्टीचे राष्ट्रीय अध्यक्ष तथा उपमुख्यमंत्री अजित पवार यांच्या संकल्पनेतील पिंक कॅम्पेन अंतर्गत त्यांना पिंक शाल, अक्कलकोट निवासी ब्रम्हांडनायक श्री स्वामी समर्थ महाराजांची प्रतिमा तसेच भला मोठा हार घालून त्यांना शुभेच्छा दिल्या. तसेच यावेळी माजी आमदार अनिकेत तटकरे यांचा देखील यावेळी किसन जाधव यांनी मखमली टोपी, शाल, पुष्पगुच्छ देऊन सत्कार केला.
दरम्यान यावेळी किसन जाधव यांनी सोलापूर महानगरपालिका विभागातील लाडकी बहीण योजनेचा लाभ सर्वसामान्य महिलांना मिळावा यासाठी योजना यशस्वी राबविणाऱ्या आशा वर्कर्स यांचे मानधन काही दिवसापासून थकीत आहे ते मानधन लवकरात लवकर मिळावे अशी विनंती नामदार आदिती तटकरे यांच्याकडे केली. तत्काळ यावर आपण आशा वर्कर्स यांचा प्रलंबित मानधनाचा प्रश्न सोडवू अशी ग्वाही यावेळी महिला बालकल्याण मंत्री तटकरे यांनी किसन जाधव यांना दिली.
या सत्कार सोहळ्याप्रसंगी राष्ट्रवादी सोलापूर शहर उपाध्यक्ष उमेश जाधव, सरचिटणीस संतोष गायकवाड, महादेव राठोड, दीपक आरगेल, आनंद गाडेकर यांच्यासह ईच्छा भगवंताची परिवाराचे सदस्य पदाधिकारी आदींची उपस्थिती होती.
आगामी स्थानिक स्वराज्य संस्था निवडणुका निवडणुकीच्या पार्श्वभूमीवर आपण राष्ट्रवादी काँग्रेस पक्षाच्या बळकटीसाठी सभासद नोंदणी मोठ्या प्रमाणात राबवा. स्थानिक स्वराज्य संस्था निवडणुकीमध्ये राष्ट्रवादी काँग्रेस पार्टीचे राष्ट्रीय अध्यक्ष तथा उपमुख्यमंत्री अजित पवार गटाचे वर्चस्व राहील यासाठी सर्वांनी प्रयत्न करावेत अशा सूचना देखील यावेळी महिला व बालकल्याण मंत्री तटकरे यांनी किसन जाधव यांना दिल्या.
