सोलापुरात पालकमंत्री चंद्रकांत पाटील यांच्या हस्ते महाराष्ट्र दिनी शासकीय ध्वजारोहण
सोलापूर : 1 मे महाराष्ट्र दिनी सोलापूर जिल्ह्याचे पालकमंत्री चंद्रकांत पाटील यांच्या हस्ते पोलीस मुख्यालयाच्या मैदानावर शासकीय ध्वजारोहण करण्यात आले. यानंतर उपस्थितांनी तिरंग्यात मानवंदना दिली.
पालकमंत्री चंद्रकांत पाटील सोलापूरकरांना महाराष्ट्र व कामगार दिनाच्या शुभेच्छा देताना महाराष्ट्राच्या जडणघडणीत कामगार वर्गाचा मोठा वाटा असल्याचा गौरव केला.
त्यानंतर परेड निरीक्षण व परेड संचलन करण्यात आले. परेड संचलनात राज्य राखीव पोलीस बल, जलद प्रतिसाद पथक, गृहरक्षक दल, पोलीस विभाग महिला व पुरूष पथक, शहर वाहतूक शाखा, सोलापूर शहर वाद्यवृंद पथक, तसेच श्वान पथक, फॉरेन्सिक सायन्स व्हॅन, बीडीडीएस, महारक्षक, वज्र वाहन, वरूण वाहन यांनीही या संचलनात सहभाग नोंदवला.
यावेळी जिल्हाधिकारी कुमार आशीर्वाद, पोलीस आयुक्त एम राजकुमार, जिल्हा परिषदेच्या मुख्य कार्यकारी अधिकारी मनीषा आव्हाळे, पोलीस अधीक्षक शिरीष सरदेशपांडे, अप्पर जिल्हाधिकारी मोनिका सिंह ठाकुर यांच्यासह जिल्हा प्रशासन, पोलीस प्रशासन, जिल्हा परिषदेचे अधिकारी मोठ्या संख्येने उपस्थित होते.
