कार्यकर्त्यांच्या ‘बॉस ‘ना वाढदिनी भावी खासदारकीच्या शुभेच्छा ; “भावी खासदार दिवा मी अजून तेवत ठेवला” !
सोलापूर : काँग्रेसमधून वेगळे होत राष्ट्रवादी काँग्रेसमध्ये प्रवेश केलेले जेष्ठ नेते सुधीर खरटमल यांचा वाढदिवस बुधवारी साजरा झाला. या वाढदिवसा दिवशी खरटमल यांना सर्वाधिक शुभेच्छा या काँग्रेस कार्यकर्त्यांच्या आल्या त्यामुळे खरटमल भारावून गेल्याचे पाहायला मिळाले.
सुधीर खरटमल यांना कार्यकर्ते बॉस असे संबोधतात. या बॉस’ना वाढदिवसाच्या दिवशी अनेक कार्यकर्त्यांनी केकवर भावी खासदार असे लिहून सुद्धा शुभेच्छांचा वर्षाव केला.
काँग्रेस शहराध्यक्ष चेतन नरोटे यांच्या प्रमुख उपस्थितीमध्ये काँग्रेसच्या असंख्य कार्यकर्त्यांनी सुधीर खरटमल यांना त्यांच्या सुधीर गॅस एजन्सी या कार्यालयात येऊन वाढदिवसाच्या शुभेच्छा दिल्या. काँग्रेस सह राष्ट्रवादी काँग्रेस, भारतीय जनता पार्टी, शिवसेना, एम आय एम अशा अनेक पक्षाच्या कार्यकर्त्यांनी त्यांना भेटून शुभेच्छा दिल्या.
सुधीर खरटमल यांना 2023 साली वाढदिवसाच्या दिवशी काँग्रेस पक्षाचे माजी महापौर आरिफ शेख व शकील मौलवी यांनी भावी खासदार असे संबोधित शुभेच्छा दिल्या होत्या. तेव्हापासून खरटमल यांच्या बाबतीत भावी खासदार अशा बातम्या येऊ लागल्या, ते चर्चेत आले, त्यानंतर त्यांनीही राष्ट्रवादीचे ज्येष्ठ नेते शरद पवार यांच्यासमोर खासदारकी लढवण्याची इच्छा व्यक्त केली तसेच आता खासदारकीसाठी माझाच क्लेम असल्याचे काँग्रेसच्या कार्यकर्त्यांना ठणकावून सांगितले होते. या भावी खासदार वरून काँग्रेस आणि राष्ट्रवादीच्या कार्यकर्त्यांमध्ये चांगलीच जुंपल्याचे पाहायला मिळाले.
दरम्यान वाढदिवसाच्या दिवशी खरटमल यांना संकल्प विचारला असता ते म्हणाले, तुम्ही जो माझा भावी खासदार नावाचा लावलेला दिवा मी अजून पर्यंत तेवत ठेवला आहे. असे सांगून आगामी लोकसभा निवडणूक लढवणारच यावर त्यांनी शिक्कामोर्तब केले.
