‘जय-राम ‘ भाऊ भाऊ ‘ ; सोलापुरात भाजपने एका दगडात मारले अनेक पक्षी
सोलापूर : विधानसभेच्या निवडणुकीनंतर सोलापुरात अनेक राजकीय समीकरणे बदलली आहेत. सोलापुरात पाच आमदार असतानाही मंत्रीपद मिळाले नाही. त्यामुळे सोलापूरकर नाराज झाले. यापूर्वीचे पालकमंत्री चंद्रकांत पाटील यांच्याकडे पुन्हा पालकमंत्री पद जाईल अशी चर्चा होती परंतु नकळत चंद्रकांत पाटलांना भाजपमधूनच विरोध झाल्याच्या ऐकण्यास मिळाले.
त्यामुळे माढा लोकसभा मतदारसंघात असलेले माण खटावचे आमदार तथा राज्याचे ग्रामविकास मंत्री जयकुमार गोरे यांच्या गळ्यात सोलापूरच्या पालकमंत्री पदाची माळ पडली. जयकुमार गोरे यांना पालकमंत्री करण्यामागे निश्चितच माळशिरसचे माजी आमदार राम सातपुते, माढ्याचे माजी खासदार रणजितसिंह नाईक निंबाळकर यासह इतर समविचारी नेत्यांचा हात असल्याचे बोलले जात आहे.
मोहिते पाटलांच्या विरोधात रान उठवणारे माजी आमदार सातपुते तसेच नाईक निंबाळकर या नेत्यांचा जयकुमार गोरे यांच्यावर प्रभाव पाहायला मिळतोय. त्यातल्या त्यात रामभाऊ यांना ताकद देण्याचा प्रयत्न भाजपने केल्याचे स्पष्ट झाले आहे.
पालकमंत्री जया भाऊ यांच्या पहिल्या दौऱ्यात रामभाऊ आणि रणजितसिंह निंबाळकर यांचेच वर्चस्व पाहायला मिळाले. पालकमंत्र्यांनी आपल्या दौऱ्याची सुरुवातच सातपुते यांच्या निवासस्थानी भेटीने केली होती. त्यामुळे जिल्ह्यात आता ‘जया भाऊ आणि रामभाऊ असे जयराम भाऊ भाऊ’ अशी जोडी दिसून येत आहे.
पालकमंत्री जयकुमार गोरे यांचे सोलापुरात काम पाहण्यासाठी सातारा जिल्हा परिषदेतून निवृत्त झालेले अतिरिक्त मुख्य कार्यकारी अधिकारी महादेव घुले यांची ओएसडी म्हणून नियुक्ती झाली आहे. त्यांच्यावरही भाऊंचा प्रभाव पाहायला मिळतो. घुले यांना ग्राम विकास विभागाचा प्रचंड अनुभव असल्याने त्यांनी आपल्या कामकाजाला सुरुवात केल्याचे पाहायला मिळाले.
