सोलापुरात नाट्य दिंडीने उत्साह संचारला ! हा गावरान कोंबडा ठरला लक्षवेधी
ढोल, ताशा, लेझीम, गुलाबी फेटे, रांगोळ्यांच्या पायघड्या अन् सर्व कलाकारांच्या उपस्थित १०० व्या अखिल भारतीय मराठी नाट्य संमेलनाची नाट्य दिंडी आज सोलापुरात निघाली.
नाट्य कलावंतांसोबत पारंपारीक लोक कला असलेल्या वासुदेव, पिंगळा, पोतराज, गोंधळी, दशावतार या लोककलाकारांच्या लोककलेने ही नाट्य दिंडी सजली होती. ही नाट्य दिंडी पाहण्यासाठी सोलापूरकरांनी रस्त्याच्या दुतर्फा गर्दी केली. नाटक किंवा सिनेमात दिसणारे कलाकार नाट्य दिंडीत दिसल्याने नागरिकांना सेल्फी काढण्याचा मोह आवरला नाही. तसेच अनेकांनी हे सर्व क्षण आपल्या मोबाईलमध्ये रेकॉर्ड केले.
बलिदान चौकापासून या नाट्य दिंडीला सुरूवात झाली. मधला मारुती चौक, माणिक चौक, दत्त चौक, लकी चौक, डॉ आंबेडकर चौक मार्गे ही दिंडी नार्थकोट प्रशालेच्या मैदानावर पोचली.
नाट्य दिंडीचे स्वागत लोकांनी खूप उत्साहात केले. नाट्य दिंडीच्या सुरूवातीला अखिल भारतीय नाट्य परिषदेचे अध्यक्ष प्रशांत दामले, नाट्य संमेलनाचे स्वागताध्यक्ष जिल्ह्याचे पालकमंत्री चंद्रकांत पाटील, नाट्य संमेलनाचे आयोजक भाऊसाहेब भोईर, ज्येष्ठ अभिनेते मोहन जोशी, शिवसेनेचे संपर्कप्रमुख प्राध्यापक शिवाजी सावंत यांच्यासह असंख्य नाट्य कलावंत सहभागी झाले होते. सोलापूरकरांची सकाळ ढोल, ताशा अंन लेझीम अन् जयघोषाच्या आवाजाने झाली. त्यात सकाळच्या वेळी वासुदेव, पिंगळा, गोंधळी, वाघ्या – मुरळी यांच्या सादरीकरणाने नागरिक भारावून गेले होते. कर्नाटकातील बाहुबली ने सर्वांचे लक्ष वेधून घेतले. या नाट्यदिंडीत दिमाखदार गावरान कोंबडा लक्षवेधी ठरला.
ही दिमाखदार नाट्य दिंडी पाहण्यासाठी नागरिकांनी रस्त्याच्या दुतर्फा गर्दी केली. ठिकठिकाणी थांबून नागरिकांनी या नाट्य दिंडीचा नयनरम्य सोहळा अनुभवला. नाट्य दिंडी आपल्या दारी असा काहीसा अनुभव या रसिकांनी यावेळी अनुभवला.
नाट्यदिंडीमध्ये संमेलन कार्यवाह विजय साळुंके, प्राचार्य शिवाजी सावंत, संमेलन कार्याध्यक्ष प्रकाश युलगुलवार, समन्वयक कृष्णा हिरेमठ, रणजित गायकवाड, पी. पी. रोंगे, सहकार्यवाह विश्वनाथ आवड, तेजस्विनी कदम, नरेंद्र काटीकर, दत्ता सुरवसे, मोहन डांगरे, अविनाश महागावकर, प्रशांत बडवे भारत जाधव, नाट्यरसिक, कलांवत सहभागी झाले.
