अय्यो ! भाजपमधून पुन्हा भाजपमध्येच ; प्रवीण डोंगरेनीं बनवले यांना ‘मामा’
सोलापूर : महापालिकेच्या रणधुमाळीत सोलापुरात सत्ताधारी भाजपची गाडी जोरदार पळत असून इतर राजकीय पक्षांना धक्के बसत आहेत. त्यातल्या त्यात काँग्रेसच्या मागे भाजप हात धुवून लागली आहे.
लोकसभा निवडणुकीत पुन्हा काँग्रेस पक्षात आलेल्या आणि विधानसभेच्या निवडणुकीत तिकीट न दिल्याने अतिशय नाराज झालेल्या माजी आमदार दिलीप माने यांनी भाजपात प्रवेश केला. त्यानंतर लगेचच माने समर्थक विनोद भोसले यांनी भाजपात प्रवेश केला.
भोसले सोबतच माजी उपमहापौर प्रवीण डोंगरे हे सुद्धा वातावरण पाहून भाजपात दाखल झाले. प्रभाग नऊ मध्ये ते इच्छुक आहेत.
प्रवीण डोंगरे हे अजितदादांच्या राष्ट्रवादी काँग्रेस मध्ये जाणार अशी शक्यता होती. नागपूरमध्ये विधानसभा उपाध्यक्ष अण्णा बनसोडे यांच्या उपस्थितीत झालेल्या बैठकीत डोंगरे यांनी लक्ष वेधले होते. महापालिका पाणी पुरवठा यंत्रणेचा त्यांचा चांगला अभ्यास दिसला. त्यामुळे राष्ट्रवादी वाल्यांनी त्यांना प्रकाशात आणले. त्यावेळी असे वाटले की ते दादांच्या राष्ट्रवादीत जातील पण डोंगरेंनी भाजपमध्ये प्रवेश करून राष्ट्रवादीला मामा बनवल्याचे दिसून येते.
दरम्यान हा राष्ट्रवादीला धक्का बसल्याची चर्चा ऐकण्यास मिळाली पण सोलापूरच्या राष्ट्रवादीने सांगितले की, मुळात डोंगरे हे राष्ट्रवादीत नव्हते, पूर्वी ते राष्ट्रवादी काँग्रेस कडून उपमहापौर झाले होते, नंतर मोहिते पाटील हे भाजपमध्ये गेल्यानंतर ते पण भाजपमध्ये गेले, त्यानंतर त्यांनी पक्ष बदलला नाही. अण्णा बनसोडे यांच्या दौऱ्या दरम्यान डोंगरे यांच्या कार्यालयाला भेट दिली असता महापालिका पाणी पुरवठा बाबत त्यांचा अभ्यास असल्याने बनसोडे यांनी त्यांना नागपूरला बोलावले होते. उलट भाजपमधून ते भाजपातच गेले. एकाच पक्षातून पुन्हा त्याच पक्षात जाण्याची अशी पहिलीच वेळ असेल अशी थट्टा राष्ट्रवादीने या प्रवेशानंतर उडवली आहे.
