बाळासाहेब शेळके, भीमाशंकर जमादार यांचा दिलीप माने यांच्या सोबतीने प्रचार ; हम साथ साथ है चा नारा
सोलापूर : माजी आमदार दिलीप माने हे पुन्हा काँग्रेसमध्ये आल्याने काँग्रेस महाविकास आघाडीच्या उमेदवार प्रणिती शिंदे यांची ताकद वाढली आहे. दक्षिण सोलापूर तालुक्यातील काँग्रेस पक्षाचे विखुरलेले नेते आता लोकसभा निवडणुकीच्या पार्श्वभूमीवर एकत्रित दिसत आहेत.
दक्षिणचे नेते सुरेश हसापुरे यांनी मागील सहा महिन्यापासूनच आमदार प्रणिती शिंदे यांच्यासाठी लोकसभेचे मैदान तयार केले होते. परंतु काँग्रेसमधील इतर नेते मात्र लांब लांब असल्याचे चित्र होतं पण दिलीप माने यांच्या घरवापसीमुळे बाजार समितीचे संचालक बाळासाहेब शेळके, दक्षिण पंचायत समितीचे माजी सभापती भीमाशंकर जमादार हे दोघेही दिलीप माने यांच्या सोबत पाहायला मिळू लागले आहेत.
यंदा काही करून प्रणिती शिंदे यांना खासदार करायचेच असा चंग प्रत्येक कार्यकर्ते आणि पदाधिकाऱ्यांनी बांधल्याचे पाहायला मिळते. शनिवारी प्रणिती शिंदे यांचा दक्षिण आणि उत्तर सोलापूर तालुक्यात दौरा होता. या दौऱ्या दरम्यान माजी आमदार दिलीप माने, बाळासाहेब शेळके, भीमाशंकर जमादार, युवकचे महेश जोकारे यांनी एकत्रित फोटो काढून “हम साथ साथ है” असा नारा दिला आहे. दक्षिण मधील सर्वच समाजाचे नेते आता एकत्रित आल्याने या तालुक्यात काँग्रेसची आणखीच ताकद वाढल्याचे बोलले जाते.
