मिलिंद थोबडेंसह शहर उत्तर मधील इच्छुकांनी घेतली बावनकुळे यांची भेट ; घातले असे विजयाचे गणित
सोलापूर : आचारसंहिता लागण्यास आता अवघे काही दिवस राहिले असून, शहर उत्तर विधानसभा मतदारसंघात दिवाळीपूर्वीच दररोज नव नवीन बॉम्ब फुटत आहेत. महाराष्ट्र व गोवा बार असोसिएशनचे अध्यक्ष तथा सिद्धेश्वर यात्रेचे मानकरी मिलिंद थोबडे यांनी आज भाजपा महाराष्ट्र प्रदेश अध्यक्ष बावनकुळे यांची मुंबईत भेट घेऊन उमेदवारी मागणी केली.
याप्रसंगी मला किंवा आमच्यापैकी कोणालाही तिकीट दिल्यास आम्ही सर्वजण एकदिलाने काम करून भाजपची सीट एक लाख मताने निवडून आणू, मात्र यंदा शहर उत्तर विधानसभा मतदारसंघाला नवा चेहरा देणे गरजेचे असल्याचे शिष्टमंडळाने सांगितले.
याप्रसंगी माजी महापौर शोभा बनशेट्टी, पद्मशाली शिक्षण संस्थेचे अध्यक्ष दशरथ गोप, माजी शहराध्यक्ष रामचंद्र जन्नु, माजी सभागृह नेते सुरेश पाटील, माजी स्थायी समिती सभापती जगदीश पाटील, प्रदेश कार्यकारणी सदस्य हेमंत पिंगळे, राजाभाऊ माने, अशोक कटके, अमर बिराजदार, शशी थोरात, अक्षय अंजिखाने, सागर अतनुरे, विनोद गडगे आदी उपस्थित होते.
मागील चार टर्म आमदार असलेल्या विजयकुमार देशमुख यांच्या विरोधात त्यांच्याच पक्षातील काही प्रमुख पदाधिकारी इच्छुक झाल्याने त्यांच्या अडचणीत वाढ झाल्याचे पाहायला मिळत आहे.