सोलापूर : गेली ८ वर्षे लोकमंगल राज्यस्तरीय साहित्य पुरस्कार देऊन साहित्यिकांचा गौरव करते आहे. लोकमंगल साहित्य पुरस्काराचं हे नववं वर्ष असून यंदाच्या लोकमंगल साहित्य पुरस्कारासाठी शांता गोखले (मुंबई), राजू बाविस्कर (पुणे) आणि वसंत गायकवाड (पुणे) यांची निवड करण्यात आलीय. हा पुरस्कार वितरण सोहळा रविवारी, ७ जानेवारी रोजी सायंकाळी ०६ वा. किर्लोस्कर सभागृहात (चार हुतात्मा पुतळा जवळ) प्रमुख अतिथी राजीव खांडेकर (संपादक, एबीपी माझा, एबीपी न्यूज, मुंबई) यांच्या प्रमुख उपस्थितीत होणार असल्याची माहिती आमदार सुभाष देशमुख यांनी शनिवारी सकाळी एका पत्रकार परिषदेत दिली.
यंदाचे लोकमंगल फाऊंडेशन आयोजित, लोकमंगल वाचनालय पुरस्कृत पुरस्कार शनिवारी घोषित करण्यात आले. लोकमंगल राज्यस्तरीय साहित्य पुरस्कार-२०२३ करिता • निर्मला पाटील यांचे आत्मकथन कादंबरी – शांता गोखले (मौज प्रकाशन गृह, मुंबई), • काळ्यानिळ्या रेषा आत्मचरित्र – राजू बाविस्कर (राजहंस प्रकाशन, पुणे) आणि • गोतमबुद्ध कादंबरी – वसंत गायकवाड (मेहता पब्लिशिंग, पुणे) या साहित्यकृतींची निवड करण्यात आलीय, २५ हजार रुपये रोख, स्मृती चिन्ह आणि सोलापुरी चादर असं या पुरस्काराचं स्वरूप असल्याचे आमदार सुभाष देशमुख यांनी सांगितले.
साहित्य क्षेत्रातील लक्षणीय कार्याबद्दल व्यक्ती किंवा संस्थेला देण्यात येणारा पुरस्कार • संस्था – कलासक्त, पुणे आणि केल्याने भाषांतर – त्रैमासिक – सुनदा महाजन यांची निवड करण्यात आली आहे. २५ हजार रुपये रोख, स्मृती चिन्ह आणि सोलापुरी चादर असं पुरस्काराचे स्वरूप आहे.
सोलापुरी साहित्याला देण्यात येणारा यंदाचा पुरस्कार • झांबळ – कथासंग्रह – समीर गायकवाड (मनोविकास प्रकाशन) यांना प्रदान करण्यात येतोय. ११ हजार रुपये रोख, स्मृती चिन्ह आणि सोलापुरी चादर असं पुरस्काराचे स्वरूप आहे, असंही त्यांनी यावेळी म्हटले.
नीतिन वैद्य, प्रा. डॉ. ऋचा कांबळे, शिरीष देखणे व डॉ. दत्ता घोलप हे पुरस्कार निवड समितीचे सदस्य आहेत. या पुरस्कारासाठी समन्वयक म्हणून शोभा बोल्ली या काम पाहत आहेत.
या कार्यक्रमास मोठ्या संख्येने साहित्य सांस्कृतिक प्रेमींनी उपस्थित रहावे, असं आवाहन लोकमंगल साहित्य पुरस्कार समितीचे अध्यक्ष रोहन देशमुख यांनी केली आहे.
