सोलापूर जिल्हा परिषदेत सध्या विधान परिषदेच्या निवडणुकीचे काय होणार यासह लाचखोरी प्रकरणाचीच सर्वत्र चर्चा आहे. झेडपीत सर्व पक्षाचे सदस्य विधान परिषद निवडणूक व्हावी म्हणून एकत्र झाले आहेत, त्याच दरम्यान गुरुवारी माजी आमदार तथा राष्ट्रवादी काँग्रेसचे प्रदेश उपाध्यक्ष दिपक आबा साळुंखे हे जिल्हा परिषदेत आले होते.त्यांचे समर्थक सभापती अनिल मोटे यांच्या केबिन मध्ये ते गेले, सभापतींच्या खुर्चीवर बसले.
आबा आलेत समजल्यावर राष्ट्रवादी काँग्रेसचे जिल्हाध्यक्ष, ज्येष्ठ नेते काका साठे मोटे यांच्या केबिनमध्ये बहुतेक प्रथमच गेले, आबा आल्याचे समजताच मोटेंच्या टक्केवारी आरोपाने वैतागलेल्या अध्यक्ष अनिरुद्ध कांबळे (अण्णा) यांची पाऊले सुध्दा मोटे यांच्या केबिनकडे वळाली.
यावेळी नंतर इतर सदस्य सुद्धा आले, त्यांच्यात विधान परिषद निवडणूकीच्या गप्पा झाल्या. या बैठकीचे फोटो नंतर दीपक आबांच्या कार्यकर्त्यांनी सोशल मीडियावर व्हायरल केले.
काही वेळाने जिल्हा परिषद मध्ये आबांचे तालुक्यातील विरोधक भाजपचे जिल्हाध्यक्ष श्रीकांत देशमुख हे अध्यक्ष कांबळे यांच्या केबिन मध्ये होते. तिथे दिपक साळुंखे यांची चर्चा झाली. यावेळी काही पत्रकार सुद्धा होते, फोटो पाहून अध्यक्ष कांबळे यांना आबांनी वाईट वागणूक का दिली असा सवाल एका कार्यकर्त्याने उपस्थित केला. जिल्हाध्यक्ष देशमुखांनी अध्यक्ष कांबळे यांना का?गेलात अशी विचारणा केली तेव्हा कांबळे यांनी सहज गप्पा मारायला गेल्याच सांगितले. याचवेळी खुर्चीचा विषय निघाला असता चिडलेल्या देशमुख यांनी दिपक आबांना लक्ष्य केले.
दिपक साळुंखे यांना खुर्चीवर बसणे शोभते का? स्थानिक स्वराज्य संस्थांचे कोणतेही पद त्यांच्याकडे नाही. मग त्यांना त्या खुर्चीवर बसण्याचा अधिकार नाही, स्वतःच्या पक्षाच्या ज्येष्ठ जिल्हा अध्यक्षांना ते समोर बसवतात, जिल्हा परिषदेचा अध्यक्ष हा तर राज्यमंत्री दर्जाचा आहे, केवळ कांबळे हे मागासवर्गीय अध्यक्ष आहेत म्हणून अशी वागणूक का? खरे तर त्यांनी जिल्हा परिषद अध्यक्षांना खुर्ची द्यायला हवी, सभेत सामाजिक समतेच्या गप्पा मारायच्या, आणि आचरणात मात्र बलुतेदारी का? हीच राष्ट्रवादी काँग्रेसची संस्कृती आहे का? या शब्दात जिल्हाध्यक्ष देशमुखांनी दिपक साळुंखे यांना टार्गेट केले.
