सोलापूर : राज्याचे महसूल मंत्री तथा जिल्ह्याचे पालकमंत्री राधाकृष्ण विखे पाटलांचा मोठा दबदबा आहे. ते सोलापुरात आले की, माजी पालकमंत्री विजयकुमार देशमुख यांच्या दौऱ्यात अजिबात नसतात, यामागचे कोडे अद्यापही सुटलेले नाही. मात्र आमदार सुभाष बापू हे आवर्जून विखे पाटलांसोबत पहायला मिळतात. आमदार सचिन दादा तर जिल्हाध्यक्ष असल्याने त्यांचे वजन वेगळेच आहे. आता तर माजी जिल्हाध्यक्ष शहाजी भाऊ पवार हे सुद्धा बापू अडून पालकमंत्र्यांच्या जवळ-जवळ जाताना दिसतात.
पालकमंत्री राधाकृष्ण विखे पाटलांनी शनिवारी धावता दौरा केला, खरे तर ते सोलापुरात मुक्कामी होते, पण ऐनवेळी दौरा रद्द करून बैठका आटपून त्यांना जावे लागले. सांगोला कार्यक्रम आटपून ते हेलिकॉप्टरने सोलापुरात आले, मात्र सांगोल्याला गेलेले नेते धावत पळत सोलापूरला आले, म्हणे हेलिकॉप्टरमध्ये गर्दी झाल्याने ते उडेना म्हणून अनेकांना खाली उतरावे लागले.
सोलापुरात पालकमंत्री आल्यावर गाडीत समोर राधाकृष्ण विखे पाटील, मागे, आमदार समाधान आवताडे, सुभाष देशमुख, खासदार रणजितसिंह निंबाळकर होते. काही वेळाने शहाजी पवार हे प्रांताधिकारी ज्योती कदम यांच्या सोबत पालकमंत्र्यांच्या दुसऱ्या वाहनात नियोजन भवनात आले.
जेव्हा बैठका आटपून पालकमंत्री विखे पाटील निघाले, तेव्हा त्यांच्या अगोदर इनोव्हात त्यांच्या एकदम मागच्या सीटवर शहाजी भाऊंनी बसण्यात नंबर मारला. मधल्या सीटवर सुभाष देशमुख, खासदार रणजितसिंह निंबाळकर व समाधान आवताडे बसले होते, पण जागेची अडजेस्टमेंट होत नसल्याने नाईलाजाने समाधानदादांना उतरावे लागले व दुसऱ्या गाडीत जाऊन बसले, दादा उतरल्यावर बापूंनी हात जोडून नक्की काय म्हटले काय समजले नाही.
