सोलापूर : राष्ट्रवादी काँग्रेसचे नेते शरद पवार यांनी सोलापूर महापालिकेची जबाबदारी महेश कोठे यांना दिल्यापासून पक्षातील निष्ठावान नेत्यांना हे काहीसे पचनी पडलेल नाही. परंतु, महापालिकेत कुठे तरी सत्तेपर्यंत पोहोचायचे असेल तर कोठे शिवाय पर्याय नाही हे सुध्दा राष्ट्रवादी काँग्रेसचे स्थानीक नेते जाणून आहेत. त्यामुळे महेश कोठे राष्ट्रवादीत आल्यापासून काँग्रेस आणि भाजपच्या काही मोठ्या कार्यकर्त्यांनी प्रवेश केला.
यामध्ये आमदार विजयकुमार देशमुख समर्थक बिज्जू प्रधाने, काँग्रेसचे माजी शहराध्यक्ष सुधीर खरटमल, माजी महापौर नलिनी चंदेले, माजी महापौर यु एन बेरीया यांचा समावेश आहे.
राष्ट्रवादी काँग्रेस पक्षात शहराध्यक्ष भारत जाधव यांना या पदावर बरीच वर्षे झाली आहेत त्यामुळे नवीन शहराध्यक्ष नेमण्याच्या हालचाली सुरू झाल्या आहेत. या पदासाठी पक्षातील अनेक जण इच्छुक आहेत परंतु, आगामी महापालिकेच्या दृष्टीने महेश कोठे यांच्या सांगण्यावरूनच अध्यक्ष नेमला जाणार असल्याची माहिती आहे. कोठे यांनी सुधीर खरटमल यांच्या नावाची शिफारस वरिष्ठांकडे केली होती पण खरटमल शहराध्यक्ष पेक्षा सोलापुर लोकसभा निवडणुकीसाठी जास्ती इच्छुक असल्याचे समजते. तशी इच्छा आहे त्यांनी नेत्यांसमोर व्यक्त केली आहे.
आता शहराध्यक्ष पदासाठी बिज्जू प्रधाने यांचे नाव समोर येत आहे. सोलापूर शहरातील पत्रा तालीम परिसरात बिज्जू प्रधाने यांनी भाजपची व्होट बँक वाढवली. भारतीय जनता पार्टीच्या बूथ यंत्रणेची चांगलीच माहिती असलेल्या प्रधाने यांचा फायदा निश्चित राष्ट्रवादी काँग्रेसला होणार आहे. त्यामुळे शहराध्यक्ष पदासाठी आता प्रधाने यांच्या नावाचा विचार पक्ष करत असल्याचे माहिती समोर आली आहे.
येणाऱ्या काही दिवसातच राष्ट्रवादी काँग्रेसला नवा शहराध्यक्ष मिळणार असून सुधीर खरटमल की बिज्जू प्रधाने या दोघांपैकी कोणाच्या नावावर पक्ष शिक्कामोर्तब करतोय याची उत्सुकता राष्ट्रवादीच्या कार्यकर्त्यांना लागली आहे आणि शहराध्यक्ष निवडीमध्ये निश्चितच महेश कोठे हेच बाजी मारतील ही शक्यता सुद्धा नाकारता येणार नाही.
