सोलापूर : सोलापूर शहरातील भारतीय जनता पार्टीचे नेतृत्व आपणाला विश्वासात घेत नाही, जाणिवपूर्वक खच्चीकरण केले जात आहे असा ठपका ठेवत सोलापूर शहर भारतीय जनता पार्टीचे सरचिटणीस बिज्जू अण्णा प्रधाने यांनी आपल्या पदाचा तसेच भाजप सदस्य पदाचा तडकाफडकी राजीनामा दिला. त्यानंतर ते राष्ट्रवादी काँग्रेसमध्ये प्रवेश करणार असल्याच्या चर्चा सुरू झाल्या.
दरम्यान रविवारी त्यांनी आपल्या समर्थकांची बैठक घेऊन म्हणणे जाणून घेतले यावेळी समर्थकांनी भाजप सदस्य पदाचे सामूहिक राजीनामे देण्याचा सुर आवडला, कार्यकर्त्यांच्या बैठकीनंतर बिज्जू प्रधाने यांनी माजी महापौर महेश कोठे यांची त्यांच्या निवासस्थानी भेट घेतली.
या सर्व घडामोडींनंतर बिज्जू प्रधाने यांची एक पोस्टर व्हायरल झालेली आहे त्यामध्ये राष्ट्रवादी काँग्रेसचे प्रदेशाध्यक्ष जलसंपदा मंत्री जयंत पाटील हे सोमवार व मंगळवार दोन दिवस सोलापूर दौऱ्यावर आहेत यादरम्यान प्रधाने हे जयंत पाटील यांच्या कोणत्याही कार्यक्रमात प्रवेश करणार नाहीत तर ज्या परिसरात ते महापालिका निवडणुकीला उभे राहणार आहेत त्या बाळे येथील सुभाष डांगे यांच्या निवासस्थानी राष्ट्रवादी काँग्रेसचे घड्याळ आपल्या हाती बांधणार आहेत.
असे पोस्टर सध्या व्हायरल झाले आहे. यावरून त्यांचा राष्ट्रवादी काँग्रेस मध्ये प्रवेश निश्चित झाल्याची चर्चा सोलापूरच्या राजकारणात सुरू झाली आहे.
काही दिवसांपूर्वी प्रधाने यांच्या कार्यकर्त्यांकडून अण्णा हे भावी आमदार असे पोस्टर समोर आले होते या पोस्टरवरून हा सर्व गोंधळ झाल्याची चर्चा आहे. निश्चितच या पोस्टरवरून भाजपचे नेतृत्व आपला लाडका असलेल्या बिज्जू प्रधाने यांच्यावर नाराज झाल्याचं ऐकण्यास मिळते. त्यावरूनच या सर्व घडामोडी घडल्या असल्याची चर्चा आहे.
