माळशिरस : तंबाखू खाण्याच्या कारणावरून दोघांमध्ये वाद झाला. त्या वादाचे रूपांतर हाणामारीत झाले. या हाणामारीत जखमी झालेल्या एकाचा घरी गेल्यावर मृत्यू झाला. ही घटना सोलापुर जिल्ह्यातल्या माळशिरस तालुक्यातील श्रीपूरमध्ये घडली. मयत हा वंचित बहुजन आघाडीचा कार्यकर्ता असून त्यांनी नगरपंचायतची निवडणूकही लढवली आहे.
कल्याण लांडगे असे मयताचे नाव असून यात महाळुंग येथील बाबासाहेब भोसले याच्यावर खुनाचा गुन्हा दाखल झाला आहे. शनिवारी रात्री सव्वा आठच्या दरम्यान श्रीपूर येथे ही घटना घडली. वंचित बहुजन आघाडी या पक्षाचे कार्यकर्ते असलेले कल्याण लांडगे यांनी नुकतीच झालेली महाळुंग -श्रीपुर नगरपंचायतीची निवडणूक लढवली होती. या निवडणुकीच्या दरम्यान त्यांच्या शेजारीच राहणारे महेश रणपिसे व महाळुंग येथील बाबासाहेब भोसले यांच्यामध्ये वैमनस्य आले होते.
शनिवारी रात्री श्रीपूर येथील शक्ती वाईन्स समोर कल्याण लांडगे उभे असताना त्या ठिकाणी बाबासाहेब भोसले आला व त्याने तंबाखू मागितली. कल्याण लांडगे यांनी तंबाखू दिली नाही म्हणून दोघांमध्ये वाद झाला. त्यात कल्याण लांडगे यांना लाथाबुक्क्यांनी व कोल्हापुरी चपलीने मारहाण करण्यात आली, असे कल्याण लांडगे यांचा मुलगा करण लांडगे यांनी दिलेल्या फिर्यादीत म्हटले आहे.
घरी परतल्यानंतर कल्याण लांडगे यांनी अंग दुखत आहे म्हणून आपल्या मुलाला शरीराला मालिश करण्याचे सांगितले. मुलाने वडिलांच्या शरीराला मालिश करून तो हात धुण्यासाठी जाऊन परत येईपर्यंत कल्याण लांडगे निपचित पडलेले आढळून आले. त्यांना तत्काळ अकलूज येथील खाजगी दवाखान्यात उपचारासाठी नेण्यात आले. डॉक्टरांनी त्यांना मृत घोषित केले.
मुलगा करण लांडगे यांच्या फिर्यादीवरून याप्रकरणी पोलिसांनी बाबासाहेब भोसले याच्यावर खुनाचा गुन्हा दाखल केला आहे. बाबासाहेब भोसले हे फरार आहे.
