सोलापूर : जिल्ह्यातील सर्व ग्रामपंचायत हद्दीतील शासकीय व गायरान जमिनीवरील अतिक्रमण येत्या 31 डिसेंबर अखेर सक्तीने काढा. गरज पडल्यास तहसीलदार व पोलीस प्रशासनाची मदत घ्या अशा सक्त सूचना जिल्हाधिकारी मिलिंद शंभरकर यांनी जिल्ह्यातील सर्व गटविकास अधिकाऱ्यांना दिल्या.
जिल्हाधिकारी शंभरकर यांनी मंगळवारी बहुउद्देशीय सभागृहात जिल्ह्यातील सर्व गटविकास अधिकारी, सर्व तहसीलदार, पोलीस प्रशासन, सार्वजनिक बांधकाम, महावितरण, भूमी अभिलेख कार्यालयातील कर्मचाऱ्यांची बैठक घेतली. यावेळी निवासी उपजिल्हाधिकारी शमा पवार, तहसीलदार मोहाळे यांची प्रमुख उपस्थिती होती.
या बैठकीत अतिक्रमण काढण्याची रूपरेषा सर्वानुमते ठरविण्यात आली.
सोलापूर जिल्ह्यातील शासकीय व गायरान जागेवरील अतिक्रमण काढण्याचा असा आहे आराखडा
18 नोव्हेंबर रोजी सर्व अतिक्रमण धारकांना नोटीस देण्यात येणार आहेत. 21 नोव्हेंबर रोजी अतिक्रमण काढण्या संदर्भात सर्व उपाययोजना करणे, आढावा घेण्यासाठी तालुकास्तरावर समिती गठीत करणे, तसेच तहसीलदार, गटविकास अधिकारी, मुख्याधिकारी यांच्या संयुक्त स्वाक्षरीने गायरान जमिनीवरील अतिक्रमण धारकांची नावे, गट नंबर, क्षेत्राबाबत व इतर तपशील यांची गावनिहाय यादी संकलन करणे, उच्च न्यायालयाच्या न्याय निर्णयाप्रमाणे सोलापूर जिल्ह्यातील सर्व न्यायालयामध्ये जिल्हा परिषद मुख्य कार्यकारी अधिकारी यांच्या अधिनस्त सर्व गटविकास अधिकाऱ्यांनी गायरान जमिनी बाबत कॅव्हेट दाखल करावे, तालुकास्तरीय समितीने अतिक्रमण काढण्याबाबतचा गाव निहाय आराखडा तयार करणे सर्व ग्रामपंचायतींना माहिती देणे, हा रगडा मुख्य कार्यकारी अधिकारी यांच्यामार्फत जिल्हा प्रशासनाला सादर करणे, 28 नोव्हेंबर ते 2 डिसेंबर दरम्यान अतिक्रमण धारकांना नोटिसा देणे, गावपातळीवर घोषणा करणे, 5 डिसेंबर ते 9 डिसेंबर दरम्यान संबंधित तालुकानिहाय समितीने ग्रामपंचायतला पोलीस बंदोबस्त सह अतिक्रमण काढणे संदर्भात आवश्यक ती साधन सामुग्री उपलब्ध करुन देणे, अतिक्रमण काढण्याची कार्यवाही सुरु करणे.
