पुणे : पुण्यात शिवसैनिक आक्रमक झाले आहेत. त्यांनी आंदोलन सुरू केले असून आमदार तानाजी सावंत यांच्या कार्यालयाची तोडफोड करण्यात आली आहे. कार्यालयाचे मोठे नुकसान झाले आहे. तसेच पुण्यात एकनाथ शिंदे समर्थक आमदारांविरोधात शिवसैनिकांनी रस्त्यावर उतरून वैद्यकीय मदत कक्षाच्या बोर्डावर असलेल्या एकनाथ शिंदे यांच्या फोटोला काळे फासले आहे. शुक्रवारीही शिवसैनिकांनी आमदार मंगेश कुडाळकर यांच्या कार्यालयावर दगडफेक केली होती. तर दिलीप लांडे यांचे पोस्टर फाडले होते.
2019 ला महाविकास आघाडी सरकार सत्तेत आल्यावर शिवसेनेनं तानाजी सावंत यांनी मंत्रीपदाची संधी दिली नाही. तेव्हापासूनच तानाजी सावंत नाराज असल्याची चर्चा होती. अखेर बंडखोरी करत ते एकनाथ शिंदे यांच्या गटात सामील झाले आहेत.
सध्या राज्यात अनेक नाट्यमय घडामोडी घडत आहे. शिवसेनेच्या आमदारांनी बंडोखोरी केल्यामुळं शिवसैनिक चांगलेच आक्रमक झाले आहेत. बंडखोर आमदारांच्या विरोधात पवित्रा शिवसैनिक पवित्रा घेत असल्याचे चित्र दिसत आहे. तानाजी सावंत यांच्या पुण्यातील कार्यालयावर शिवसैनिकांनी हल्ला केला आहे. या घटनेनंतर तानाजी सावंत यांच्या पुण्यातील निवासस्थाना बाहेर पोलीस बंदोबस्तात वाढ करण्यात आली आहे.
