सोलापूर महानगरपालिकेचे बजेट भाजपच्या पाच वर्षांच्या सत्तेत बहुतेक पहिल्यांदा व्यवस्थित मांडले गेले असेल, जरी अर्थसंकल्पीय सभा ही ऑनलाइन पद्धतीने झाली असली तरी शेवटचे बजेट असल्याने कोणत्याच पक्षाने गोंधळ घातला नाही किंवा विरोध केला नाही. या सभेत दोन चित्र मात्र वेगळे दिसले, तसे पाहिले तर महापालिकेचे बजेट मांडण्याचे नशीब लागते, यंदा शिवानंद पाटील यांच्या नशिबी होते,
श्रीनिवास करली हे कमनशिबी ठरले, सुटबुटात आणि बजेट बॅग घेऊन आले होते मात्र नगरसेविका श्रीदेवी फुलारे यांनी त्यांच्या उत्साहावर पाणी फेरले, शिवानंद अण्णा एकदम साध्या पद्धतीने आले हातात कोणती बॅग नव्हती, केवळ बजेट कागदाचा बंच घेऊन ते सभागृहात दाखल झाले, बजेट मांडले, त्यांनी काय वाचलं ते माईकच्या कमी आवाजामुळे समजले नाही, बरेच ऑनलाइन जॉईन झालेले नगरसेवक ओरडत होते अण्णा काय बोलत आहे समजत नाही. बाजूला बसून जामगुंडे काका मार्गदर्शन करत होते, शिवानंद अण्णांचे एकदाचे बजेट संपले,
त्यानंतर विरोधी पक्षनेते अमोल बापू शिंदे हे आपल्या उपसूचनेचे बजेट वाचायला उठले, त्यांनी प्रथम आपले नेते मुख्यमंत्री उद्धव ठाकरे, नगरविकास मंत्री एकनाथ शिंदे, यांच्यासह महापालिकेतील ज्येष्ठ नेते महेश कोठे, सर्व जिल्हाप्रमुख, शहर प्रमुख, शिवसेनेचे नगरसेवक, अमोल शिंदे हे विरोधी पक्षनेता होताना सही केलेल्यांचे बापू यांनी यावेळी आभार व्यक्त करत आपल्या बजेटमधील उपसूचना मांडायला सुरुवात केली, विरोधी पक्षाकडून बजेट मागण्याचं पाच वर्षात अमोल शिंदे यांच्या नशिबात होतं आणि ते त्यांनी सार्थक करून दाखवलं.
भारतीय जनता पार्टी कडून पाच वर्षाच्या कार्यकाळात सुरेश पाटील, श्रीनिवास करली, संजय कोळी, शिवानंद पाटील यांना सभागृह नेतेपद मिळालं. मागील चार वर्षापासून सोलापूर महानगरपालिकेचे स्थायी समिती सभापतीपद वादामुळे न्यायालयाने थांबून ठेवले आहे. खरे तर महापालिकेचे बजेट हे स्थायी समितीचे सभापती मांडतात परंतु यंदा सभागृह नेत्याच्या नशिबात होते शेवटचे वर्ष असल्याने शिवानंद पाटलांनी खरेतर भारतीय जनता पार्टीचे पंतप्रधान नरेंद्र मोदी, अमित शहा, माजी मुख्यमंत्री देवेंद्र फडणवीस, त्यांचे नेते आमदार विजयकुमार देशमुख, आमदार सुभाष देशमुख, या सर्व नेत्यांची नावे घेणे आवश्यक होते मात्र तसे झाले नाही. या बजेटमध्ये खरे मार्केट मारले ते शिवसेनेच्या अमोल बापू शिंदे यांनीच.
