‘स्टँडिंग, बांधकाम, समाज कल्याण अन् जलसंधारण’ समितीला डिमांड ; सदस्यांची नेत्यांमार्फत फिल्डिंग
सोलापूर: सोलापूर जिल्हा परिषद अध्यक्ष, उपाध्यक्ष आणि विषय समिती सभापती निवडीनंतर आता 68 सदस्यांच्या समिती सदस्य म्हणून निवडी होणार आहेत. येणाऱ्या पंधरा एप्रिल रोजी होणाऱ्या सर्वसाधारण सभेत अध्यक्ष दीपक वैद्य हे समिती सदस्य जाहीर करतील.
तत्पूर्वी कोणत्या समिती मध्ये कोणाला घ्यायचे याचे नियोजन मागील दोन दिवसांपासून जिल्हा परिषदेमध्ये सुरू आहे. सदस्यांची यादी पालकमंत्री जयकुमार गोरे हेच फायनल करणार असल्याने त्यांच्या कार्यालयामार्फत अध्यक्ष वैद्य, उपाध्यक्ष पवार, गटनेत्या रश्मी बागल आणि मुख्य कार्यकारी अधिकारी कुलदीप जंगम यांच्या कार्यालयात बैठक अन् चर्चा सुरू आहेत.
सर्वाधिक डिमांड ही बांधकाम आणि स्थायी समितीला दिसून येते. प्रत्येक जण तीच समिती मागत असल्याची चर्चा ऐकण्यास मिळाली. या समितीच्या बैठकीत मोठ्या आर्थिक मंजूरी दिल्या जातात त्यामुळे त्यामध्ये जाण्याची मागणी आहे. मात्र काहींना जलसंधारण, समाज कल्याण, शिक्षण, आरोग्य यामध्ये ऍडजस्ट केले जाणार असल्याचे समजते. कृषी आणि पशुसंवर्धन या समितीची डिमांड कमी आहे. महिला व बालकल्याण मध्ये तर महिला सदस्य असतात त्यामुळे त्या समितीचे काही नसते.
68 सदस्यांमध्ये 30 विरोधी सदस्यांना कोणती समिती मिळणार याकडे नजरा आहेत. पण बरेच सदस्य हे महायुती मधील आहेत. त्यांचे भाजप नेत्यांशी असलेले वैयक्तिक संबंध पाहता त्यांना व्यवस्थित बसवले जाणार असल्याचे दिसून येते.
