आ. सुभाष देशमुखांनी घेतली बंजारा नेते युवराज राठोड यांची भेट ; काय झाली चर्चा
सोलापूर : सोलापूर लोकसभा मतदारसंघाच्या प्रचाराचा वेग वाढला आहे पंतप्रधान नरेंद्र मोदी, काँग्रेस नेते राहुल गांधी, माजी मुख्यमंत्री शिवसेना नेते उद्धव ठाकरे, उत्तर प्रदेशचे मुख्यमंत्री योगी आदित्यनाथ या प्रमुख नेत्यांच्या सोलापुरात मोठ्या सभा झाले आहेत.
आमदार प्रणिती शिंदे विरुद्ध आमदार राम सातपुते यांच्यातील अतिशय ‘काटे की टक्कर’ असल्याने कोण निवडून येणार? हा एकच शब्द सोलापुरात ऐकण्यास मिळतो. याच पार्श्वभूमीवर सोलापुरातील बंजारा समाजाचे नेते सोनाई फाउंडेशनचे संस्थापक अध्यक्ष युवराज राठोड यांची दक्षिणचे आमदार सुभाष देशमुख यांनी त्यांच्या हॉस्पिटलमध्ये भेट घेतली. या भेटीचे फोटो सध्या सोशल मीडियावर वायरल झाले आहेत. सुभाष देशमुख यांनी युवराज राठोड यांच्याकडे सक्रिय व्हा अशी अपेक्षा व्यक्त केल्याचे कळते.
युवराज राठोड यांनी दक्षिण विधानसभा निवडणूक लढवली होती. त्यांचा जुळे सोलापूर तसेच सैफुल भागात मोठा जनसंपर्क आहे. दक्षिण सोलापूर तालुक्यातील बंजारा समाजाच्या तांड्यामध्येही त्यांची चांगली ओळख आहे, काही दिवसांपूर्वी युवराज राठोड यांनी भाजप प्रदेशाध्यक्ष चंद्रशेखर बावनकुळे यांची भेट घेतली होती त्यावेळी त्यांच्या भाजप प्रवेशाची चर्चा झाली मात्र ते अजूनही अलिप्त आहेत. त्यांनी आपली भूमिका स्पष्ट केलेली नाही. एकूणच समाजाची भूमिका लक्षात घेऊन येत्या दिवसात आपली भूमिका स्पष्ट करतील असे बोलले जात आहे.
