स्वच्छतेसाठी राबले हजारों हात; पालकमंत्री, जिल्हाधिकारी, सिईओ, आयुक्तांनी हाती झाडू घेत केली पंढरी स्वच्छ
सोलापूर : आषाढी एकादशीच्या पार्श्वभूमीवर पालकमंत्री जयकुमार गोरे यांच्या संकल्पनेतून पंढरपुरात स्वच्छतेची मोहीम राबविण्यात आली. गोरेंच्या हाकेला हजारों नागरिकांनी साद देत उत्स्फूर्त सहभाग नोंदवला.
पालकमंत्री जयकुमार गोरे यांच्या उपस्थितीत छत्रपती शिवाजी महाराज चौकात या स्वच्छता मोहिमेचा शुभारंभ झाला. यावेळी जिल्हाधिकारी कुमार आशीर्वाद, जिल्हा परिषदेचे मुख्य कार्यकारी अधिकारी कुलदीप जंगम, महापालिका आयुक्त डॉक्टर सचिन ओंबासे, माजी आमदार प्रशांत परिचारक, जिल्हाध्यक्ष शशिकांत चव्हाण यांच्यासह राजकीय, प्रशासकीय तसेच सामाजिक क्षेत्रातील नागरिक मोठ्या संख्येने उपस्थित होते.
पंढरपुरात तब्बल 42 ठिकाणी एकाच वेळी स्वच्छता करण्यात आली. पालकमंत्र्यांनी स्वतः ठिकठिकाणी जाऊन सहभागी झालेल्या नागरिकांचा उत्साह वाढवला. छत्रपती शिवाजी महाराज चौकातच मोहिमेचा समारोप झाला. हजारों टन कचरा यावेळी उचलण्यात आला. यामुळे माऊलींच्या स्वागतासाठी स्वच्छ पंढरी सज्ज झाली आहे.
