सोलापूर ! आमदार प्रणिती शिंदे यांची सोलापूर इंडस्ट्रीज असोसिएशनच्या पदाधिकाऱ्यांसमवेत बैठक संपन्न झाली. सोलापूर इंडस्ट्रीज असोसिएशनच्या पदाधिकाऱ्यांसमवेत त्यांच्या विविध समस्यांबाबत बैठक आयोजित केली होती.
या बैठकीमध्ये चिंचोळी औद्योगिक वसाहतीचा संपूर्ण भाग D+ मध्ये सहभाग करून मिळावा जेणेकरून सर्वच उद्योजकांना समान न्याय मिळू शकेल. यापूर्वी 2015-16 मध्ये आमदार प्रणिती शिंदे यांच्यामुळे हा संपूर्ण परिसर D+ झोनमध्ये सामील करण्यात आला होता. परंतू आज हा औद्योगिक परिसर D व D+ अशा 2 परिसरात विभागला गेला आहे.
तसेच टेक्सटाईल्स व टेक्निकल टेक्सटाईल्स पॉवर आणि कॅपिटल सबसिडीसंदर्भात ऑनलाईन पध्दतीमध्ये उद्भवणाऱ्या समस्या व गेल्या 6-7 महिन्यांपासून या सबसिडीची अनेक प्रकरणे प्रलंबित असून त्यामुळे उद्योजकांना याचा लाभ मिळत नाही. तसेच अनेक नवीन उद्योजकांचे अर्ज ऑनलाईन पोर्टल बंद असल्यामुळे स्विकारण्यात येत नाहीत. अशा विविध समस्यांबाबत सविस्तर चर्चाकरण्यात आली. यासंदर्भात आमदार प्रणिती शिंदे यांनी वस्त्रोद्योग मंत्री अस्लम शेख व उद्योग खात्याचे प्रधान सचिव बलदेव सिंग यांच्याशी दुरध्वनीव्दारे संपर्क साधला त्यावेळी लवकरच बैठक आयोजित करण्याचे आश्वासन आमदार प्रणिती शिंदे यांनी दिले.
यावेळी सोलापूर इंडस्ट्रिज असोसिएशनचे अध्यक्ष एम. केशव रेड्डी, उपाध्यक्ष डी. राम रेड्डी, उपाध्यक्ष मनिष देशमुख, सचिव गणेश सुत्रावे, खजिनदार वासुदेव बंग, सहसचिव कमलेश शहा, कार्यकारी मंडळ सदस्य सर्वश्री सप्रेम कोठारी, अभिषेक तापडीया, रामेश्वरी गायकवाड, सागर चिट्टे आदि. पदाधिकारी उपस्थित होते.
