सोलापूर : जिल्ह्याच्या सहकार क्षेत्रात एक महत्वाची संस्था असलेल्या आणि संपूर्ण जिल्ह्याचं लक्ष लागलेल्या जिल्हा दूध उत्पादक संघाच्या संचालक मंडळाची अखेर पंचवार्षिक निवडणूक लागली. निवडून द्यायच्या 17 संचालक पैकी 12 जागा सर्वसाधारण, 2 महिला, 1 अनुसूचित जाती, 1 इतर मागासवर्ग, 1 भटक्या विमुक्त जाती समावेश आहे.
जिल्हा दूध संघाच्या निवडणूकीचा कार्यक्रम पुढीलप्रमाणेजिल्हा उपनिबंधक कुंदन भोळे हे निवडणूक निर्णय अधिकारी म्हणून काम पाहत आहेत.
नामनिर्देशन पत्र विक्री व स्वीकृती 21 जानेवारी ते 28 जानेवारी, नामनिर्देशन पत्राची छाननी 31 जानेवारी सकाळी 11 वाजता, वैध अर्जाची यादी प्रसिद्ध करणे 1 फेब्रुवारी रोजी, नामनिर्देशन पत्र मागे घेण्याची मुदत 1 फेब्रुवारी ते 15 फेब्रुवारी पर्यंत, 16 फेब्रुवारी रोजी सकाळी 11 वाजता चिन्ह वाटप, आवश्यक असल्यास मतदान घेण्याची तारीख 26 फेब्रुवारी रोजी, 27 फेब्रुवारी मतमोजणी असा निवडणुकीचा कार्यक्रम आहे.
जिल्हा दूध संघ निवडणुकीच्या पार्श्वभूमीवर माजी आमदार दिलीप माने यांच्या फार्महाऊसवर हुरडा पार्टी झाली होती या बैठकीला ज्येष्ठ आमदार बबनदादा शिंदे, माजी मंत्री दिलीप सोपल, माजी मंत्री सिद्धाराम म्हेत्रे, माजी आमदार राजन पाटील, माजी आमदार दीपक आबा साळुंखे, जिल्हा मध्यवर्ती बँकेचे संचालक सुरेश हसापुरे ,जिल्हा मध्यवर्ती बँकेचे संचालक बबनराव आवताडे, उपाध्यक्ष चंद्रकांत देशमुख या प्रमुख नेत्यांची उपस्थिती होती.
या बैठकीतच दूध संघाच्या निवडणुकीची रणनीती ठरली होती. आजपर्यंत जिल्हा दुध संघ सर्वांनी एकत्र मिळून बिनविरोध केलेला आहे. यंदा आता बरेच नेते भारतीय जनता पार्टीमध्ये असल्याने अद्याप त्यांची भूमिका स्पष्ट झालेली नाही मात्र दूध संघ बिनविरोध करण्याकडे याही नेत्यांचा कल असल्याचं बोललं जात आहे.
