सोलापूर जिल्हा परिषदेची सर्वसाधारण सभा 12 जुलै रोजी होणार होती, सभेच्या दोन दिवसांपूर्वी जिल्हा आपत्ती व्यवस्थापन कक्षाने सभा ऑनलाइन घेण्याचे पत्र दिले, त्यामुळे संतापलेल्या सदस्यांनी प्रवेशद्वारासमोर ठिय्या आंदोलन केले, सभा ही ऑफलाईन पध्दतीने खुल्या जागेत घेण्याची मागणी केली. शेवटी अध्यक्ष अनिरुद्ध कांबळे व मुख्य कार्यकारी अधिकारी दिलीप स्वामी यांनी एकत्र येऊन सभेची तारीख पुढे ढकलली, सुरुवातीला 19 तारीख काढली, नंतर 22 झाली आता 26 जुलै रोजी होणार होती.
मात्र महापालिका आयुक्तांनी फडकुले सभागृहात परवानगी नाकारली, त्याच पार्श्वभूमीवर सोमवार 26 जुलै रोजी सभा ऑनलाइन की ऑफलाईन होणार याचा घोळ कायम होता, सभेचा गोंधळ पाहता पोलिसांनी सकाळ दहापासून बंदोबस्त लावला होता, कोरोना संसर्गामुळे राज्य सरकारचे आदेश असल्याने मुख्य कार्यकारी अधिकारी दिलीप स्वामी हे ऑनलाइन सभा घेण्यावर ठाम होते,
त्यामुळे तर पदाधिकारी व सदस्य संतापले, अध्यक्ष अनिरुद्ध कांबळे यांच्या दालनात सभापती विजयराज डोंगरे, सभापती अनिल मोटे, पक्षनेते अण्णाराव बाराचारे, विरोधी पक्षनेते काका साठे यांच्यासह सुमारे 30 सदस्य व पंचायत समितीचे सभापती हे एकत्र आले, त्याठिकाणी उपमुख्य कार्यकारी अधिकारी परमेश्वर राऊत यांना बोलावण्यात आले बराच वेळ चर्चा झाली,काही वेळाने उपमुख्य कार्यकारी अधिकारी परमेश्वर राऊत अध्यक्षांच्या केबीन मधून बाहेर पडले.
त्यानंतर अध्यक्षांनी माहिती दिली, आजची सभा ही तहकूब करण्यात आली असून पुढील सभा येत्या 29 जुलै रोजी ऑनलाइन पद्धतीनेच होणार आहे मात्र त्या सभेला सर्व सदस्यांना व्यवस्थित बोलता यावे असे नियोजन प्रशासन करणार आहे प्रशासन आणि सदस्यांमधील जो असमन्वय होता तो दूर झाल्याचे सभापती डोंगरे व अध्यक्ष कांबळे यांनी सांगितले.
