सोलापूरचे सहाय्यक कामगार आयुक्त निलेश येलगुंडे यांची शासनाने बदली केली आहे त्यांच्या जागेवर पुणे येथील सहाय्यक कामगार आयुक्त निखिल वाळके यांची नियुक्ती झाली आहे. विशेष म्हणजे निलेश येलगुंडे यांनी मागील दोन दिवसापूर्वीच दहा लाखांची खंडणी मागितल्या प्रकरणी एका इसमा विरुद्ध गुन्हा दाखल केला होता.
कामगार आयुक्त यांच्या आस्थापनेवरील सहायक कामगार आयुक्त संवर्गातील अधिका-यांची कामगार उप आयुक्त पदावर पदोन्नती झाली असल्याकारणाने आणि कामगार उप आयुक्त संवर्गातील अधिका-यांच्या सेवानिवृत्तीमुळे रिक्त झाल्याने तसेच दोन्ही संवर्गातील अधिका-यांच्या बदलीने पदे रिक्त झाल्याने राज्य सरकारच्या उद्योग,ऊर्जा,कामगार विभागातील अधिकाऱ्यांच्या बदल्या करण्यात आल्या आहेत.
जिल्हाधिकारी तसेच महापालिका आयुक्तांनी निलेश येलगुंडे यांच्या कामावर कामाच्या कार्यपद्धतीवर तीव्र अशी नापसंती व्यक्त केली होती, महापालिका आयुक्तांनी त्यांचावर गुन्हा दाखल केला होता तसेच जिल्हाधिकारी मिलिंद शंभरकर यांनी तर थेट निलेश येलगुंडे यांना शासनाकडे परत पाठवण्यासाठी पत्र दिल्याची माहिती होती. त्यामुळे निलेश येलगुंडे यांची सोलापुरातील कारकीर्द वादग्रस्त अशी होती, बांधकाम कामगारांची नोंदणी तसेच नूतनीकरण मध्ये त्यांनी मोठा भ्रष्टाचार केल्याचा आरोप अनेक कामगार संघटनांनी केला होता . दरम्यान लेबर पार्टीच्या तक्रारी मुळेच येलगुंडे यांची बदली झाल्याचा दावा प्रदेशाध्यक्ष साथी बशीर अहमद यांनी केला आहे.
