पंढरपुर : गुन्हेगारी क्षेत्रात पंढरपूर पॅटर्न हा राज्यात प्रसिद्ध आहे. मात्र पंढरपूर पोलिसांनी या पॅटर्नचे समूळ उच्चाटन करण्याची मोहीम हाती घेतली आहे. दोन दिवसात शहरात कमरेला पिस्तुल लावून फिरणारे दोन जण पोलिसांनी जेरबंद केलेत. पंढरपूर शहर पोलिसांनी ही कामगिरी पार पडलीय.
शहर गुन्हे प्रकटीकरण शाखेचे सहाय्यक पोलीस निरीक्षक मगदूम यांना मिळालेल्या माहिती नुसार, 15 जानेवारी रोजी गोपाळपूर रोड वरील रिद्धी सिद्धी मंदिराजवळ एक जण कमरेला पिस्तुल लावून फिरत असल्याची माहिती मिळाली होती. या माहितीच्या आधारे सापळा लावला असता अजय बाळकृष्ण खाडे हा तिथे आढळून आला. त्याची झडती घेतली असता त्याच्याकडे दोन जिवंत काडतुस आणि पिस्तुल सापडले.
तर 16 जानेवारी रोजी कॉलेज रोड वरील हॉटेल कृष्णा जवळ एक तरुण कमरेला पिस्तुल लावून फिरत असल्याची माहिती सहाय्यक पोलीस निरीक्षक मगदूम यांनाच मिळाली. या इसमाची झडती घेतली असता गणेश रमेश शिंदे ( रा.संतपेठ ) हा पिस्तुलसह आढळून आला. शिंदे आणि खाडे वर भादवि 3, 7 , 25 नुसार गुन्हा दाखल करण्यात आलाय. या घटनेने शहरात खळबळ माजली आहे.
