सोलापूर विजापूर रस्त्यावरील हत्तूर गावाजळील कलवरी ऑर्केस्ट्रा बारवर पोलिसांनी छापा टाकून १० आरोपींना अटक केली असून २७ लाख ८९ हजारांचा ऐवज जप्त करण्यात आला. विजापूर नाका पोलीस ठाण्याच्या डीबी पथकाने ही कारवाई केली.
गुन्हे प्रकटीकरण पथकाला कलवरी ऑर्केस्ट्रा बारमध्ये काही लोक एकत्रित जमा होऊन दारु पित असून, काही महिला संगीताच्या तालावर अश्लील नृत्य करीत आहेत, अशी खात्रीशीर माहिती मिळाली. त्यामुळे पथकाने तेथे छापा टाकला.
त्या ठिकाणावरुन वैभव दत्तात्रय माळशिकारे (वय २१, वडकबाळ, ता.दक्षिण सोलापूर), वेटर अजय चंद्रकांत क्षीरसागर (वय ३०, रा. मिलिंदनगर, बुधवार पेठ), व्यापारी महेश राचप्पा अदानी (वय ५५, वणगार गल्ली, गोकाक, बेळगाव), मल्लिकार्जुन बसप्पा कुंभार (वय ४८, जमखंडी, जि. बागलकोट), प्रवीण बसवराज औरादी (वय ४२, रा. महालिंगपूर, रबकवी रोड), गुरुराज काडप्पा हलकरनी (वय २९, रा. बसवनगर, बनहट्टी, जि. बागलकोट), विलास विश्वनाथ हिरेमठ (वय ५५, रा. जमखंडी, जि.बागलकोट), रोहित पांडुरंग चव्हाण (वय ३५, रा. माशाळनगर, विजापूर रस्ता), नागेश तम्मण्णा जाधव (वय ४५, रा. सेटलमेंट फ्री कॉलनी नं. ३) व इंदोर येथील एक नर्तिका यांना अटक केली.
त्या ठिकाणी व्यवस्थापक, कामगार, नर्तिका व ग्राहक यांच्या ताब्यातून एकूण २७ लाख ८९ हजार १७० रुपयांचा ऐवज जप्त करण्यात आला आहे. याबाबत विजापूर नाका पोलीस ठाण्यात गुन्हा दाखल करण्यात आला आहे. सदर आरोपींना अटक करून न्यायालयासमोर हजर केले असता आरोपी वैभव माळशिकारे व अजय क्षीरसागर यांना एक दिवसाची पोलीस कोठडी देण्यात आली तर उर्वरित आरोपींना वैयक्तिक जातमुचलक्यावर जामीन मंजूर करण्यात आला आहे.
सदर गुन्ह्यातील आरोपी बारमालक राहुल तानाजी लकडे फरार असून त्याचा शोध चालू आहे. सदर गुन्ह्याचा पुढील तपास पोलीस उपनिरीक्षक सूरज मुलाणी हे करीत आहेत.
