‘शहर उत्तर’मध्ये तुतारीला टेन्शन ; ‘एमआयएम’ युवक अध्यक्ष मोहसीन मैंदर्गीकर विधानसभा लढविणार ; मतांचे असे कॉम्बिनेशन
सोलापूर : सोलापूरच्या शहर उत्तर मध्ये यंदा भाजपचे विद्यमान आमदार विजयकुमार देशमुख यांच्या विरोधात अनेक कार्यकर्ते बंडाचे निशान फडकावत आहेत त्यातच आता विजय देशमुख यांचे पारंपारिक विरोधक महेश कोठे हे शरदचंद्र पवार गटाच्या तुतारी कडून उभारणार असल्याने देशमुखांचे आणखी टेन्शन वाढले आहे परंतु आता महेश कोठे यांनाही टेन्शन देणारी बातमी समोर आली असून शहर उत्तर मध्ये एम आय एम पक्ष विधानसभा निवडणूक लढवणार आहे.
पक्षाचे युवक अध्यक्ष मोहसीन मैंदर्गीकर यांनी उत्तर मधून दंड थोपटले आहेत. पक्षाचे शहर व जिल्हाध्यक्ष फारूक शाब्दि यांच्याकडे मैंदर्गीकर यांनी उत्तर मधून उमेदवारी मिळावी अशी मागणी केली आहे.
मागील अनेक वर्षांपासून मैंदर्गीकर हे पक्षाचे युवक अध्यक्ष म्हणून काम करत आहेत. मोहसीन यांनी अनेक आंदोलन केली आहेत. समाजाच्या प्रश्नांवर आवाज उठवला आहे. शाब्दि यांच्या खांद्याला खांदा लावून काम करताना त्यांनी सर्वांचेच लक्ष वेधून घेतले आहे.
या मतदारसंघातील मुस्लिम समाज, आंबेडकरी समाज व इतर सर्वधर्मसमभाव मानणाऱ्या समाजात मोहसीन यांची चांगली ओळख आहे. या मतांच्या जोरावरच मोहसीन मैंदर्गीकर हे विधानसभा निवडणूक लढवणार आहेत.